Riba rednan social un biaha mas a wordo reporta un incidente cu a tuma luga ayera mainta cu un UTV na unda diferente usuarionan a capta e momento precies ora e mashin tabata na candela.
Cu esaki, a mira diferente reaccion wordo treci dilanti pa loke ta trata e uso di e mashinnan. Pa algun personanan e mashinnan ki ta wordo considera como destructor y causante di hopi boroto unda e grupo Stop UTV Tours Aruba tambe a publica e incidente aki.
Parlamentario Marisol Lopez-Tromp tambe a duna su comentario riba esaki unda a señala:
“Cuanto biaha mas e vehiculonan aki lo pega na candela riba caminda publico den trafico, mi no sa…pero fei mas cu un aña pasa tin un documento di diferente departamento hunto cu consehonan concreto pa Gobierno ehecuta. Mi a lesa e documento aki. Un di e consehonan ta pa bin cu rutanan y destinonan alternativo pa UTV / ATV pasobra nan no ta diseña pa core riba careteranan di asfalt meymey di trafico. Nan mester ta kita fei caminda publico. Te cu awe Minister President no a haci net nada pa realmente ehecuta e consehonan, y cada bes cu puntra den Parlamento, e ta contesta cortico cu lo ta papiando ke companianan.”
Pero esaki no ta prome biaha cu un UTV ta pega na candela, tampoco e ta e prome cu a keda envolvi den accidentenan basta serio. E pregunta na autoridadnan y instancianan concerni ta ki otro tipo di opcion por tin pa e mashinnan aki no sigui causa mas daño na naturalesa y trece insiguridad na e usuarionan cu ta huur nan y na personanan den trafico?
