Mester introduci mas medida den politica pa logra e meta di gobierno pa balans fiscal, mientras ta crea espacio pa mas inversion publico. Bao di e baseline di e staff, e medidanan di impuesto introduci recientemente no ta suficiente pa logra e metanan presupuestario y ta bay rekeri mas medida pa aumenta entrada y reduci gasto recurente. Esaki segun e Staff Report pa Consulta Articulo IV 2023 di Fondo Monetario Internacional (IMF).
Specificamente, IMF ta bisa cu ta necesario:
Mobilisacion di entrada: Por genera entrada adicional door di introduci VAT (BTW) pa reemplasa e sistema di impuesto indirecto. Tin espacio pa mehora administracion di impuesto y aduana door di aumenta digitalisacion, impone castigo financiero riba evasion, mehora transparencia, y aumenta auditoria basa riba riesgo. Un evaluacion diagnostico di administracion di impuesto (TADAT) lo yuda desaroya un plan di reforma mas comprensivo.
Contene medida di salario: E eliminacion di e recorte den salario di sector publico cu a keda implementa durante Covid-19 mester ta compaña pa e eliminacion di varios suplemento di salario (por ehemplo overtime, bonus y uitkering.)
Racionalisacion di gasto riba bienes y servicio: Un Revision di Gasto Publico ta spera di keda ehecuta pa Banco Mundial, cu ta bay yuda informa esfuersonan pa elimina gasto di prioridad abao.
Simplifica transferencia na empresanan estatal (SOE). Esfuersonan ta necesario pa mehora e prestacion di SOE y reduci e transferencianan na e entidadnan aki ( por ehemplo prijs cu ta permiti recuperacion di costo y mehoracion den eficiencia di SOE).
Reforsa e safety net social: Mehoracion di proteccion social ta importante pa facilita reformanan fiscal. Mester establece un sistema pa lansa sosten temporal y enfoca riba hogarnan vulnerable den caso cu tin mas shock na prijs di cuminda y fuel (por ehemplo door di institucionalisa un sistema di sosten di entrada enfoca, similar na esnan cu a introduci durante pandemia.)
Bao di un scenario di politica activo, e medidanan adicional aki lo yuda logra e metanan fiscal di gobierno a termino medio. E surplus fiscal lo mester aumenta cu 0.5 porciento di GDP na 2023, mediante aumento di cumplimento cu impuesto indirecto (0.2 porciento di GDP) y reduccion di gasto riba bienes y servicio (0.2 porciento di GDP.) Racionalisacion di subsidio na hogarnan (0.1 porciento di GDP), reforsa e safety net social, y reduccion di transferencia na SOE (0.2 porciento di GDP) lo sostene e metanan a medio tempo (treciendo debe bao di 70 porciento di GDP pa 2028) mientras ta permiti pa un aumento den gasto capital.
E sistema di pension ta crea riesgo fiscal a termino largo. Den ausencia di mas reforma, ta spera cu e sistema di pensioen ta bay cuminsa core deficit cuminsando rond di aki cinco pa seis aña, cabando cu su reservanan pa mita di decada 2030. Esaki a pesar di esfuersonan den pasado pa mehora e situacion financiero di sistema di pensioen. Restauracion di balans actuarial den e sistema lo rekeri un tasa di contribucion mas halto y/pf un tasa di reemplaso menor.
Un marco di politica fiscal a termino medio lo yuda duna prioridad na gasto y hancra e caminda pa reduccion di debe. Autoridadnan a haci progreso den mehora maneho financiero publico y transparencia fiscal y ta den proceso di establece metanan fiscal a termino medio. Un marco di presupuesto a termino medio (MTBF) bon diseña – guia pa un anker di debe y clausulanan di escape predetermina – lo yuda duna forma na prioridadnan strategico, hancra espectativa, y guia e desaroyo di e presupuesto anual den un manera cu ta consistente cu obhetivonan macro-fiscal mas amplio. Esaki tambe lo permiti autoridadnan comunica miho nan plannan fiscal a termino medio, y door di cumpli cu e metanan, demostra nan compromiso cu disciplina fiscal.
