E luna di october ta un luna special pa varios motibo, un di e motibonan principal ta e hecho cu den e luna di october mundialmente ta enfoca riba e conscientisacion di cancer di pecho.

‘The Pink Month’ (e luna ros) unda cu ta celebra Breat Cancer Awareness ta un campaña unda cu ta aumenta e conscientisacion tocante e malesa. E meta di esaki ta pa involucra mas hende cu por den recauda fondo y conocemento pa yuda brinda sosten na investigacion pa cu e malesa ademas di brinda e conocemento necesario pa brinda sosten pa esunnan mas afecta.

1 den cada 7 muhe ta ser diagnostica cu cancer di pecho den nan bida. Actualmente no tin suficiente conocimento tocante e causanan di cancer di pecho, y pa e motibo aki e deteccion trempan di e malesa aki ta permanece un di e metodonan primordial pa controla cancer di pecho. Ora cu cancer di pecho ta ser detecta trempan, e chens di por cura esaki ta hopi mas grandi y positivo.

Cancer di pecho por tuma luga den diferente parti di e tehido di e pecho. Inicialmente, e crecemento cancerino ta mara na e parti den e pecho unda cu esaki a cuminsa (“in situ”), generalmente causando tiki sintoma y cu potencial minimo pa plama.

Durante tempo, cancer ‘in situ’ den etapa 0, por progresa y invadi e tehido rond di esaki den e pecho, birando un cancer di pecho invasivo. Esaki por plama na otro organonan di e curpa tambe. Den varios caso, si un persona fayece pa causa di cancer di pecho, e ta pa motibo cu e cancer a plama na demas organonan den e curpa.

Tratamento pa cancer di pecho por ta sumamente efectivo, specialmente ora cu e malesa keda detecta trempan. Tratamento di cancer di pecho hopi biaha ta consisti di un combinacion di kita esaki via cirugia, radioterapia y medicamento, manera terapia hormonal of kimoterapia. E tipo di tratamento aki, por preveni e crecemento di e cancer ademas di e plamamento di esaki, cual ta salba bida.

Cancer di pecho no ta un malesa cu por transimiti ni tampoco ta infeccioso. Diferente na algun otro tipo di cancer cu tin causa relaciona cu infeccion, manera Papillomavirus Humano (HPV) y cancer cervical, no tin infeccion viral ni tampoco bacterial cu ta conecta na e desaroyo di cancer di pecho.

Aproximadamente mita di e cancer di pecho ta desaroya den hende muhe cu no tin factor di riesgo pa e cancer aki cu ta facil di identifica, excluyendo e hecho cu nan ta un hende muhe y tin mas di 40 aña di edad. Cierto factor ta aumenta e riesgo di cancer di pecho, manera un edad halto, obesidad, uso dañino di alcohol, historia familiar di cancer di pecho, exposicion na radiacion, historia reproductivo manera na ki edad e ciclo menstrual a cuminsa, uso di tabaco y terapia hormonal post-menopausal.

Bo por reduci bo riesgo na cancer di pecho pa medio di;

Tin un actividad fisico regular

Controla bo peso
Evita e uso dañino di alcohol
Evita di ta exponi na huma di tabaco
Evita uso prolonga di hormona
Evita di ta exponi excesivamente na radiacion

Aunke cu e porcentahe di reduccion di e control di e factornan aki ta un poco abao/medio, e ta importante pa haci uso di tur oportunidad cu nos tin pa reduci e riesgo, mirando cu e factor mas fuerte y principal na cancer di pecho, ta simplemente e hecho di ta un persona femenino, hecho cu nos no por controla. Sin importa esaki, 0.5 pa 1% di cancer di pecho por tuma luga den hende homber, cual ta haci importante pa nan tambe tene cuenta cu reduccion di riesgo, mirando cu e tratamento di cancer di pecho den hende homber ta sigui e mesun principio di e maneho pa hende muhe.

Manera a menciona anteriormente, mientras mas trempan cancer di pecho keda diagnostica, mas grandi e chens ta cu por tin un tratamento exitoso.

Cancer di pecho frecuentemente ta presenta su mes como un bala den e pecho. E ta importante pa muhenan cu haya algo similar den nan pecho consulta nan dokter no mas laat cu 1 pa 2 luna aunke no tin dolor asocia cu esaki. Atencion medico na momento cu mira e prome sintoma potencial, ta aumenta chens di un tratamento exitoso.

Sintomanan y señalnan comun ta inclui;
 Bala of hinchamento den e pecho of banda di e kokodek
Un cambio den e cuero
Cambio den e color di e pecho, manera pecho cora of inflama
Cambio den e nipple, manera hundi bay aden
Likido inusual ta lik for di ambos nipple

E cancer aki por presenta den varios diferente manera, cual ta e motibo dicon un examinacion medico ta sumamente importante. Personanan cu tin abnormalidadnan persistente cu generalmente ta dura mas di 1 luna mester pasa door di test manera mammografia. Den tempo, celulanan cancerino por plama na otro organonan incluyendo pulmon, higra, cerebro y wesonan. Na momento cu nan yega e sitionan aki, e sintomanan relaciona cu cancer manera dolor di weso y dolor di cabes por aparece.

E lucha contra cancer di pecho tin mester di accion y conscientisacion ta motiva accion. Ban inspira otro, ban plama e mensahe y yuda otro. Conta bo storia y motiva e personanan rond di bo pa haci nan mammografia.

Cancer di pecho ta touch nos tur di un of otro manera, ban uni y promove conscientisacion.