Diabierna mainta e caso di Aruba Birdlife Conservation (ABC) contra desaroyadornan di Azure Condominiums a sigui y e hues nobo cu a trata e caso e biaha aki a dicta 21 di September e dia pa duna veredicto. Esaki tabata e di cuater caso di Aruba Birdlife Conservation y segun e fundacion, seguramente tin mas na caminda.
23 di Augustus ultimo e caso di Aruba Birdlife Conservation contra desaroyadornan di Azure Condominiums a wordo posponi pa por a reemplasa hues William Winfield pa motibo cu manera a wordo previamente informa, segun abogado di PGM Condo Builders Sr. Rudi Oomen, hues Winfield a ‘Like’ e pagina di Facebook di ABC y pa e motibo aki a considera e hues parcial. Hues Sr. A. Van de Leur a trata e caso diabierna y despues di cuater ora di deliberacion y analisacion den corte cu tur banda a haya oportunidad pa presenta nan argumento, a dicta pa duna veredicto dia 21 di September proximo.Abogado di PGM Condo Builders Sr. Rudi Oomen a presenta hunto cu directornan y ehecutivo di PGM Builders unda tambe abogado Sr. Steffen R. Hagen tabata presente representando Land Aruba. Sr. Greg Peterson a bini cu boluntarionan di Aruba Birdlife Conservation y un rato por a nota e tension cu a crece den e sala di corte mientras e caso tabata wordo trata. ”Un punto hopi importante pa Land Aruba ta cu si ABC eigenlijk tabata tin interes nan mester a entrega keho desde cu e ‘bouwvergunning’ a wordo entrega. Mas importante tambe, ta ser bisa cu e Ruimte Ontwikkelings Plan (R.O.P.) ta uno ‘bindend’ locual no ta e caso, esaki ta mas bien un ‘beleid’. Kinan ta tratando di un tereno cu supuestamente ta den Groen Gebied pero segun Land Aruba esaki ta un zona turistico cu ta marca tambe den e R.O.P. asina.” Sr. Hagen ta bisa Bon Dia. Abogado di ABC, Sr. Geert Rep ta splica Bon Dia cu nan ta insisti cu PGM Builders a construi riba Groen Gebied den Bubali Plas y mester deshaci di tur locual a wordo construi caba eynan.
Na 2013, Parlamento a vota pa protega 16 area di naturalesa y haci nan parti di Parke Arikok. ”Ora cu nan bisa cu nos no a haci nada, esaki no ta berdad pasobra nos a hasta pone henter un Parlamento move pa vota pa protega e luganan aki y entre nan Bubali mes ta un. ” Presidente di ABC, Sr. Greg Peterson ta splica Bon Dia.
Un lucha persistente pa naturalesa
”Ningun hende a bisa cu e lucha pa naturalesa lo ta uno facil, un David chikito contra dos Goliath poderoso. Aruba su naturalesa no por defende su mes.” Presidente di ABC, Sr. Greg Peterson ta comenta. Desaroyadornan di e condos, esta PGM Builders a bini corte cu un documento di 18 pagina cu ta detaya nan proyecto y tur locual e ta encera. ”E abogado di gobierno, cu ta e di tres abogado pa e caso aki a bay conhuntamente cu e desaroyadornan contra e parti di naturalesa. E tabata un dia hopi largo. Nos ta un organisacion relativamente chikito, no mesun poderoso manera un gobierno of infraccionistanan grandi asina, pero nos ta luchando pa algo un tiki sagrado cual ta e naturalesa di Aruba. ”Sr. Peterson ta bisa Bon Dia. Sr. Peterson ta agrega, cu e ta kere e caso aki tambe lo ta interesante pa yen otro tipo di cosnan riba nos isla y no solamente con ciudadanonan por lucha pa un caso di naturalesa of pida tereno. ”Kisas otro burgers por siña di esaki tambe con nan den futuro por defende nan mes si algo ta pasa den nan bario cu nan no ta gusta.” Sr. Peterson ta bisa.
