Den e ultimo añanan, e problema di “economia di envelop,” cu ta caracterisa cu soborno y faboritismo di algun, ta continua obstaculisa e progreso economico y destrui e integridad di institucionnan publico. E complehidad burocratico, particularmente den otorgamento di permiso y di tereno, ta crea barera significativo pa esnan cu ta desea pa haci negoshi di manera legal y responsabel. Cu e presion di aumento di costo di bida, hopi persona ta sinti cu nan ta wordo forsa pa subi e caminda robes, asina sosteniendo un ciclo di corupcion cu ta afecta e panorama economico den su totalidad.

Corupcion ta prospera den un ambiente cu ta falta di transparencia y dunamento di cuenta. Den hopi caso, e proceso burocratico cu ta diseña pa regula comercio y nos economia en general, ta bira un obstaculo na lugar di facilita progreso. E “Entrepreneur” cu ta busca permiso ta keda pega den un neishi haraña di red tape, cu ta haci dificil of te hasta imposibel pa nan por nabega e canalnan corecto sin wordo tenta pa duna soborno pa nan keda cla. E situacion aki ta specialmente desanima e negoshante honesto cu ta haci un esfuerso pa ta corecto y cumpli cu tur regla mientras ta enfrenta desafio significativo.

Pa ataca e problema sistematico cu ta alimenta e “economia di envelop”, varios medida por ser implementa pa crea un sector publico mas transparente y responsabel:

Transparencia y dunamento di Cuenta: Establece sistemanan cu ta promove transparencia den e proceso di otorga permiso. Implementacion di iniciativanan manera www.publico.aw recientemente institui pa Minister di Integridad, cu por permiti ciudadano pa monitorea actividad gubernamental y tene funcionario cu ta duna cuenta responsabel, cu ta reduci oportunidadnan pa corupcion.

Digitalisacion di Procesonan: Adopta plataformanan digital pa e aplicacion y proceso di permiso. Mediante e reducion di interacion fisico entre negoshinan y empleado publico, e potencial pa soborno y corupcion por wordo disminui significativamente, hibando na un procesamento mas rapido y eficiente di aplicacion pa henter e aparato gubernamental. Manera e sistema recien institui pa e otorgamento di permiso di taxi pa e Minister di Transporte.

Control di Burocracia: Crea organo di control independiente cu ta monitorea regularmente e actividad di funcionario publico cu ta involucra den e proceso di otorga permiso. E control por yuda pa detecta iregularidad y promove un sistema mas husto cu ta recompensa integridad. Esaki ta trabaonan cu e Bureau Integriteit Aruba recien institui tin como meta entre otro.

Campaña di Concientisacion: Lansa Campañanan educativo pa eleva conocimiento riba consecuencianan di soborno y corupcion. E campañanan aki por crea un cambio di mentalidad cu ta duna balor na etica y integridad ariba tuma “shortcut” y practica nan no etico.

Recompensa pa Integridad: Implementa un sistema di recompensa pa empleado publico cu ta demostra integridad y transparencia den nan trabou. Incentiva e comportacion etico den institucion publico por inspira otro pa sigui e ehemplo.

Simplificacion di Procesonan: Simplifica e proceso di solicitud pa permiso, reduciendo e cantidad di documento necesario y eliminando obstaculonan innecesario. Un sistema mas eficiente lo haci mas facil pa negoshinan honesto pa cumpli cu regulacion.

Mecanismo pa haci Denuncia Anonimamente: Promove un sistema cu ta permiti denuncia corupcion anonimamente, pa permiti individuonan pa reporta iregularidadnan sin temor pa represaya. Esaki lo motiva mas hende pa tuma accion contra corupcion.

A pesar cu e solucionnan aki no lo resulta den un cambio inmediato, nan por hunto contribui pa crea un ambiente mas transparente y husto. E caminda pa un sector publico mas honesto y eficiente ta largo, pero cu un compromiso di tur e participantenan, ta posibel pa logra un cambio positivo.

Na final di dia, mientras nos ta ataca e problema di corupcion den e sector publico, ta crucial pa sostene negoshinan honesto cu ta dispuesto pa sigui e caminda legal. Cu e medida corecto na luga, nos por crea un ambiente economico unda integridad ta wordo recompensa, y negoshi por prospera sin e sombra di corupcion.

Mester finalisa bisando cu e trabounan recien desplega pa e Ministerio di Integridad ta duna balor agrega na e meta comun pa yega mas cerca di un sistema husto y un economia mas accesibel pa tur empresario of ciudadano en busca di un permiso of servicio di e aparato publico, contrarestando e corupcion creciente den e sector publico. E mester bira un meta di tur gobernante pa crea e condicionnan aki den henter e aparato gubernamental si di berdad nos ta desea di prospera den e tempo di digitalisacion masivo di e economia mundial actual, caminda cu e exigencianan pa haci negoshi mundialmente ta sigui subi y inversionistanan mas y mas no ta desea di participa den e actonan aki mirando cu den un “frega di wowo” por perde nan imagen publico y nan empresa den e proceso.

Un ehempel prominente di corupcion cu a marca e mundo empresarial ta e scandal di Odebrecht. E compania cu antes tabata un lider den construccion a bira un simbolo di corupcion global, cu su actividadnan malintenciona a resulta den un scandal cu a destrui e reputacion di e empresa y a resulta den consecuencia severo pa varios gobierno na nivel mundial. E scandal a revela un patronchi di soborno, “bribery”, y manipulacion cu a involucra decenas di funcionario publico y negoshinan den varios pais. Pa hopi empresa, e caso di Odebrecht ta sirbi como un advertencia cu ta enfatisa cu no tin lugar pa corupcion den un mundo cu ta mustra e tendencia pa fortifica integridad. E movemento contra corupcion ta hayando forsa globalmente, cu meta pa garantisa un ambiente di negoshi unda transparencia y etica ta primordial, evitando asina cu otro compania tin e mesun suerte di destruccion.