9 miyon florin tin destina pa caretera specialmente den bario, ya cu e peticion y e necesidad ta hopi grandi.
Durante e tratamento di presupuesto di DOW pa 2020, minister di Infrastructura, Marisol Lopez-Tromp a recorda cu parlamento a aproba un mocion na 2018/19 relaciona cu e tempo nos dilanti pa crea un fondo di 9 miyon florin riba presupuesto pa atende cu e necesidad aki. E ta haya cu e suma aki lo por yuda pa trata tur e peticion cu tin pa e aña nos dilanti. Entre otro necesidad di caretera, nan ta percura pa e proyecto di vivienda social por tin nan camindanan, el a bisa.
Otro aspecto cu tin di haci cu caretera ta e sleeping police. Tin un cantidad di peticion haci pa traha sleeping police pa purba di mitiga e coremento duro di auto den bario residencial.
E punto aki tabata un preocupacion cu minister Lopez-Tromp a elabora durante e tratamento di e presupuesto di DOW diahuebs ultimo. E mandatario a señala cu hopi ciudadano ta sinti necesidad pa bin cu sleeping police dilanti di nan cas, ya cu hende ta core duro dilanti di nan cas, creando situacion peligroso pa nan yiunan, muchanan y esunnan cu ta cana eybanda. Pero tambe dilanti di scolnan caminda hopi muchanan ta transita.
Minister di Infrastructura a referi na e cantidad di solicitud cu actualmente ta stagna. Ademas e ta haya cu ta bon pa tur hende ta consciente di e costo di e spleeping police. Pa un grandi ta 5 mil florin y un chikito 3 mil florin.
“Awor cu e hendenan ta bin cu e peticion bo por splica e hende cu esey ta e gasto,” den sala di parlamento el a bisa. E ta haya cu compara cu otro gasto infrastructural e gasto aki ta relativamente chikito, pero cu e tin costo cu ne tambe.
Tin un schedule di implementacion di e sleeping police cu ta uno largo, ya cu e lista di deseo ta grandi. Nan ta den diferente area manera Sabana Basora, Jaburibari, Papayastraat, Wayaca, Seroe Blanco, Piedra Plat y diferente area den playa, entre otronan.
