Mediante un comunicado riba nan rednan social, directiva di Stichting Protestants Christelijk Onderwijs Aruba (SPCOA) a informa comunidad cu directiva di e scol aki ta e unico instancia cu ta autorisa pa tuma e decision di cera John Wesley College (JWC) ubica na San Nicolas.
Den e documento, nan ta indica cu door di informacion incorecto cu a sali riba diferente medio, nan kier clarifica y duna un tiki mas splicacion tocante ken ta e instancia autorisa y tambe pakico a dicidi di cera John Wesley College.
“Mester enfatisa cu e decision aki no tabata uno facil pa e directiva. Sinembargo, directiva despues di analisa tur hecho no por a haci otro cu tuma e tristo decision pa cera John Wesley College.”
SPCOA como instituto di Enseñansa ta un fundacion y como tal ta ricibi fondo di subsidio di gobierno. A base di statuutnan di SPCOA, e directiva tin e maneho di e fundacion y ta, teniendo na cuenta e statuutnan aki, autorisa pa efectua tur e actonan di maneho y direccion, cual ta cay dentro di e proposito di e fundacion.
E decision pa directiva pa JWC ta basa riba investigacion valido y di confiansa den cooperacion cu partidonan externo.
E investigacion aki tin tres componente: na prome luga a constata, investiga y documenta iregularidadnan pa cu e control di calidad di enseñansa manera ta hancra den ley y maneho di SPCOA, como por ehemplo, maneho di aceptacion na MAVO y derecho pa forma klasnan. Na di dos luga, a investiga e cantidad di alumno na scol, cual a baha drasticamente desde aña escolar 2016-2017 (227) te cu awor 2022-2023 (64).
Na di tres luga a investiga e finanzas y posibilidad pa tene scol habri cu e tiki alumnonan cu tin na scol. Un instituto di enseñansa ta ricibi subsidio for di un normbedrag pa cada alumno y pa cantidad di local di edificio di e scol. Pa mas cu 7 aña JWC tin un caida di cantidad di alumno, subsidio ta calcula na base di cantidad di alumno, ademas, e derecho pa subsidio y formamento di klas ta hancra den ley, kiermen no por desvia di esaki.
For di aña escolar 2022-2023 mester opera sin un vierde klas (4e) MAVO, pa motibo cu no tin suficiente alumno pa por forma un MAVO klas 4. A base di e cifranan por mira cu scol ta keda cu e problema pa yena e klasnan.
“Lamentablemente mester a yega na e conclusion cu e no ta factibel pa tene scol habri cu 64 alumno y mirando e pronostico pa e añanan binidero e no ta rasonabel tampoco pa mantene scol habri,” e documento ta indica.
Tabata dia 19 di april cu Bon Dia Aruba a publica cu studiantenan di JWC tabata preocupa e ceramento di nan scol. Nan a manda un carta dirigi na minister di Enseñansa Endy Croes exponiendo nan motibonan di preocupacion na unda ayera finalmente SPCOA a splica comunidad pakico nan mester a tuma e decision aki.
