E importancia di liña di enseñansa continuo, cuminsando na e crèchenan

Un di e 13 recomendacion den e doorlichting rapport ta trata e liña di enseñansa continuo cu ta envolve e crèchenan na Aruba. Pa e punto aki, e grupo di trabao ta indica cu mester haci e atencion di crèche ampliamente accesibel y parti di e liña di enseñansa continuo.

E sistema di cuido di crèche di Aruba ta den man di institucionnan priva cu ta liber pa determina e suma di contribucion di e mayornan. Resultado di esaki ta cu e crèche ta accesible solamente na e famianan cu por paga esaki financieramente. Debi na cu no a implementa un Ordenansa Nacional di crèche, no ta existi un base legal pa e rekisitonan di calidad of di supervision.

E grupo di trabao ta recomenda e implementacion di un marco legal den cual e crèche por ta parti di e liña di enseñansa. E tarea di e crèche ta stimula e desaroyo di e muchanan chikito pa nan ta bon prepara pa drenta educacion preparatorio, kleuter. Ademas ta necesario pa crèche ta ampliamente accesible pa yega tambe na e alumnonan cu ta den situacionnan familiar desfaborabel.

Institucionnan priva ta brinda cuido na e muchanan di Aruba, tin biaha den edificionan bon manteni y tin biaha den garagenan cu a bira crèche. E crèche ta liber pa determina e contribucion di e mayornan, no tin subsidio di gobierno pa e mayornan cu e crèche no ta economicamente factibel.

E educacion di peuterschool, incluyendo crèche, ta depende di Ministerio di Asuntonan Social. Ordenansa Nacional di crèche (15 di juni 2017) ta establece un marco legal nacional pa promove calidad den e cuido di muchanan, crèche. E marco aki, e grupo di trabao ta señala, ainda no a wordo implementa y no tin un supervision.

Fundacion Pa Nos Muchanan (FPNM), parti di Ministerio di Asuntonan Social, ta comprometi na mehora e calidad di e institucionnan registra cu nan. E registro di crèche na FPNM ta boluntario, pero no tin un idea di cuanto institucionnan di crèche no ta registra.

E grupo di trabao ta remarca cu na aña 2020 Central Bureau Statistiek (CBS) bao instruccion di Ministerio di Asuntonan Social a ehecuta e midimento di referencia (Nulmeting) di crèche pa e componentenan basico di seguridad, salud, politica pedagogico y personal. E Nulmeting aki mester ta e referencia pa e implementacion gradual di e regulacion nacional cu areanan di enfoke determina.

E Ordenansa Nacional ta establece, entre otro, cu e politica cu mester sigui pa loke ta trata e actividadnan di hunga y desaroyo di e muchanan mester wordo estableci den e manual di rekisito di calidad di crèche cu ainda no a wordo elabora y aproba.

Den e documentonan aki, nan ta subraya, e crèche no tin un tarea explicito den e preparacion di e muchanan pa un entrada exitoso den e sistema di educacion, of un rekisito pa e politica pedagogico. FPNM ta curasha e crèchenan cu ta registra pa traha cu trahadonan cualifica, traha den obhetivonan cognitivo y aplica e codigo di denuncia di violencia domestico.

No ta existi rekisitonan legal pa stimula e desaroyo di e muchanan di seis siman pa tres aña di edad. Como resultado e empresanan priva cu ta organisa e crèchenan ta tuma nan propio decisionnan, den termino di espacio personal y enfoke, como tambe den e contribucion di e mayornan.

E imagen di seguridad den e cuido infantil ta limita. Esaki, segun e grupo di trabao, ta debi un parti pa motibo cu no tin subsidio, pues ta calcula cu solamente e 50% di e muchanan ta bay crèche.

Si e crèche ta prepara e muchanan pa drenta educacion preparatorio, y con nan ta hacie, ta varia hopi. Tambe, ora cu e situacion na cas di e muchanan ta desfaborabel, ta perde oportunidadnan pa stimula e desaroyo di competencianan den e muchanan y asina bay bon prepara pa un scol preparatorio. E crèche por desempeña un papel importante den esaki, e grupo di trabao ta enfatisa.

E crèchenan por contribui na e desaroyo di e mucha, por ehempel den loke ta trata e lenguahe y preparacion pa educacion infantil y tambe na seguridad emocional y proteccion di e integridad fisico di e mucha.

E grupo di trabao ta recomenda haci e cuido di crèche economicamente accesible pa tur alumno y haci e cuido di crèche parti di e proceso di aprendisahe continuo. Esaki kiermen cu ademas di e recomendacionnan di e midimento di referencia, tambe mester formula rekisitonan legal pa obhetivonan di desaroyo cu ta coincidi cu e necesidadnan di desaroyo y enseñansa di e alumnonan.

Pa e desaroyo y actualisacion di e rekisitonan legal, nan ta señala, e pais por usa e memorandum consultivo di desaroyo di crèche, Playderwise Discover di maart di 2018.

E gobierno a dicidi cu Educacion Preescolar lo permanece bao di e Ministerio di Asuntonan Social y no lo wordo transferi pa e Ministerio di Educacion. Pa loke ta e liña di formacion continuo, lo colabora cu Inspectie Onderwijs. Segun e grupo di trabao ta informa, ainda no a determina con esaki lo sucede.