Durante e debate di Camara di Comercio di 14 di november ultimo, a lanta e pregunta di e costo halto di vivienda y su impacto riba e ciudadanonan pa yega na nan propio cas y e prijsnan di huur cu ta subiendo sin precendente. Con esaki ta posibel? Den e articulo aki nos ta pone atencion un biaha mas ariba esnan cu ta forma parti di e “establecimento” na Aruba.
E “establecimento” ta referi na un grupo influyente cu ta mantene e sistema cu ta stroba desaroyo y progreso. Un analisis mas profundo ta mustra cu lidernan di industria aki na Aruba ta un obstaculo pa progreso, manteniendo un sistema cu ta limita acceso na vivienda accesibel.
E monopolio den material di construccion
Ta dos compania so ta produci bloki na Aruba, ta domina e mercado y no tin competencia. Esaki ta haci cu e prijs di bloki ta un di esun mas halto den e region Caribe. Un vivienda traha di e forma convencional ta consisti di aproximadamente 70% di productonan traha di cement. Pa e motibo aki, si ta baha prijs di bloki y cement, lo por baha e prijs di construccion considerablemente.
Sin competencia fuerte, e posibilidad cu e prijs ta baha ta limita, resultando den vivienda cu ta menos accesibel pa e pueblo. Un oligopolio cu ta practica “price gouging” ta un situacion den cual algun companianan grandi ta domina e mercado, y aunke tin otro participante, e competencia ta realmente limita. Esaki ta duna nan e libertad pa subi prijsnan halto artificialmente, resultando den “price gouging”, unda e consumidor ta sufri pa via di e costo exorbitante di producto y servicio. E falta di competencia fuerte ta haci dificil pa e prijsnan baha, manteniendo e costo halto y treciendo desbentaha pa e consumidor y economia general. [“Price gouging” ta nifica cu un compania, sin motibo valido, ta subi prijs hopi mas di loke ta considera rasonable, husto of necesario.]
DIP un factor di presion
DIP, e departamento cu ta regula tereno erfpacht na Aruba, tambe ta pone presion pa via di su maneho mas slow y ineficiente. Esaki ta haci dificil pa ciudadanonan haya tereno pa construccion y ta trece un costo mas halto pa vivienda. Un sistema di distribucion cu ta traha mas rapido y eficaz lo yuda pa por amplia acceso y stabilisa e prijs di vivienda.
E rol di Aruba Fair Trade Authority (AFTA)
Aruba Fair Trade Authority ta un organisacion cu ta encarga cu sigura un competencia husto den negoshi na Aruba. Como un organisacion recien institui, por trece cambio pa aumenta competencia y haci e mercado di material di construccion mas husto. Pa esaki pasa, e funcionarionan mester tin e curashi pa enfrenta e monopolio y busca un balans cu ta beneficia e pueblo, a pesar cu esaki por nifica cu mester bay contra companianan grandi y personanan influyente. Banda di e esaki, e pueblo mes tambe mester mantene su apoyo pa e gobernante y funcionarionan cu ta lucha na bienestar di e pueblo, protegiendo nan contra desacreditacion di parti di e establecimento door di rechasa e atakenan baho den medionan di comunicacion cu ta ser usa pa proteha nan interes. Strategianan cu diariamente ta ser usa.
E caminda pa progreso
Si nos por baha e prijs di cement y bloki, e costo di construccion di cas lo baha tambe, haciendo vivienda mas accesibel pa mas hende. Pa yega na esaki, ta importante cu e liderato enfoca riba e necesidad di e pueblo y busca pa frena e sistema monopolistico cu ta limita progreso. Un enfoke den cual e interes di e pueblo na prome lugar lo trece un economia mas husto y un pais cu mas oportunidad pa tur ciudadano yega na un vivienda. Vivienda no ta un luho, vivienda ta un necesidad basico di e ser humano y pa e motibo aki, cualkier gobierno cu realmente ta para pa progreso pa un y tur lo presenta nan plan di accion na e electorado y no simplemente promesanan di lo bay soluciona e problema creciente aki.
