Diasabra atardi, pa 5or di atardi exactamente Sr. Heintje Ras a drenta oficialmente e mina di fosfaat na Sero Colorado unda cu e lo pasa 100 dia cu e meta pa recauda fondo pa asina construi un mega-museo pa Aruba.
Prome cu su entrada oficial tabata un momento hopi special y emocional pa Sr. Ras. El a ricibi bendicion di pastoor Andres Makovic, despues a canta e himno di Aruba Dushi Tera y asina Sr. Ras a dispidi di su famia y amistadnan, y hunto cu su dos yiunan cu lo compañele durante e prome 10 dianan, nan dal nan prome stap pa drenta e mina.
“Mi ta bay y mi no ta bay defrauda mi dos yiunan, mi no ta bay defrauda Aruba y mi no ta bay defrauda mundo. Pone man na boso curason anto realisa, compronde kico ta e motibo, kico ta e causa tras di esaki. Danki na e pa e apoyo y sosten di tur persona”, Sr. Ras a expresa djis momentonan prome cu el a drenta e mina.
E meta principal di e hazaña di e 100 dianan den e mina di fosfaat ta pa recauda fondo pa construi un museo pa Aruba. Sr. Ras a cuminsa cu un museo chikito na su cas y despues di varios aña a acumula hopi tesoronan historico cu no tin espacio mas na su residencia. “Aruba ta bay den historia”, el a bisa. “Nos tin un solo meta, cual ta pa recauda fondo pa asina inverti den un tereno of edificio cu nos por regala Aruba un mega-museo, cu lo bira e museo mas grandi no solamente di Aruba, pero di Caribe”.
Un otro meta cu Sr. Ras tin pa e hazaña aki ta pa pone Aruba su nomber resona na nivel internacional. Na momento cu Sr. Ras logra sali di e mina di fosfaat dia 9 di januari 2022 pa 5or di atardi, el lo kibra record internacional y e hazaña lo wordo reconoci pa Guinness World Records. “Aruba su nomber lo wordo poni den e buki mas famoso di mundo, Guinness World Records book”.
Durante e 100 dianan cu Sr. Ras lo permanece den e mina e lo cana, e lo explora, investiga y e lo documenta tur su investigacion den un buki cu e lo entrega na Gobernador di Aruba cu e obhetivo pa yuda educa muchanan di scol mas ariba e historia di fosfaat di Aruba.
Sr. Ras tin un team grandi su tras cu ta sostene y apoy’e pa logra e hazaña historico aki y asina yega na su soño cu ta e meg-museo pa Aruba. E team aki ta consisti di dokternan, nutricionista, masahista, boluntarionan y coleganan di Fundacion Museo di Antiguedad Nos Bieunan. E ta conta cu e apoyo di Brandweer, Mariniers Kazerne y Rode Kruis cu tambe ta dispuesto pa yuda den loke ta necesario.
Den e ultimo secondenan prome cu el a drenta e mina emocionnan tabata halto y cu lagrima na wowo, Sr. Ras a bisa, “si bo tin un soño hamas regal’e na ningun hende, para firme, lucha y determina pa bo realisa bo soño. Mi ta bay bin”.
