Cu un siman faltando pa e paradanan grandi, Aruba ta absorbi den pleno celebracion di carnaval. Pero kico tin tras di e celebracion tradicional aki? Con e ta afecta participantenan psicologicamente? Y mas importante, kico ta e funcion social di carnaval?
Segun un articulo den leadingbeat.com, e palabra carnaval ta bin di idioma Latin, y ta nifica literalmente “retira e carni”, cual ta nifica e inicio di Cuaresma den kalender Cristian. Na mayoria di pais, periodo di carnaval ta cay entre januari y maart y ta compaña pa un variedad di tradicion cultural.
Den su buki “Bailando riba Caya,” Barbara Ehrenreich ta papia den profundidad tocante e historia y funcion social di carnaval a traves di diferente sociedad y periodonan historico. Tambe e ta splica con e evolucion di Cristianismo na Europa a conduci na e creacion di carnaval manera nos ta conoce.
Maske por parce awo dificil pa kere, Cristianismo na su inicio tabata involucra hopi canto, baile, bebemento y ritualnan ecstatico. Siguiendo tradicionnan religioso anterior, manera adoracion di Dionysus – dios di biña na Grecia antiguo – tabata importante pa e devotonan drenta den un estado di trance y “experimenta” dios. Nan relacion cu dios tabata profundamente personal.
Sinembargo, mientras Cristianismo a bira e religion oficial, prome di imperio Romano y despues di esun Byzantino, cos a cuminsa cambia rapidamente. E no tabata mas pa e individuonan realisa ritualnan y haya acceso na divinidad riba nan mes. Esaki a bira e trabao di pastoornan designa, coronan y e autoridadnan eclesiastico oficial. Es mas, alrededor di siglo 4 AD, bailamento a keda prohibi por completo y a keda proclama como e trabao di diabel.
Casi mil aña despues, den Edad Media, devoto y pastoornan ainda tabata disfruta canto, bebemento y bailamento den Iglesianan Catolico. Esaki tabata anathema pa e hierarkia di e iglesia, cu tabata kier introduci mas disciplina y controla entusiasmo di hende. E compromiso cu nan a bin cune tabata pa permiti e comportamento ecstatico aki pa tuma lugar solamente durante dianan festivo di e iglesia y pafo di e misanan. Sin intencion, esaki a conduci na e creacion di e concepto di carnaval.
Funcion social di carnaval
Obviamente hende semper a baila pafo, pero e prohibicion di e autoridadnan eclesiastico a conduci na un brote di creatividad festivo. De hecho, tin cantidad di anecdota di mania di baile colectivo durante fin di Edad Media cu algun conduciendo na hende cu a fayece di cansancio, segun leadingbeat.com.
Gradualmente, e mania di baile a keda institucionalisa y transforma den festivalnan publico secularisa – carnaval – separando nan completamente for di religion. Carnaval lo sucede riba dianan particular di aña y lo involucra principalmente procesionnan door di centro di ciudad. Carnaval a bira un manera pa hende di tur background escapa nan realidad socioeconomico y bira uni.
E aspecto mas importante di carnaval tabata burla di esnan na poder. Esaki tabata actua como alivio pa presion di e clasenan mas abao. Un homber lo bisti como e “Rey di e Bobonan” y burla di autoridadnan. Nos ta mira rastronan di esaki na Aruba den e concepto di Prins y Pancho.
Despues, esaki a expande den mascaradanan cu tur hende burlando di esnan na poder. Carnaval na Aruba tambe a inicia cu e sorto di fiestanan aki di mascarada, unda tabata bisti e mascara pa por participa mas completamente sin mester sacrifica reputacion social.
Den algun caso, carnaval a bira e cuna di rebelion y revolucion, algo cu cada bes mas a crea miedo entre e autoridadnan.
Despues, e reforma protestante a conduci na prohibicion di carnaval. Hende no tabata permiti pa canta, baila of mustra ningun señal di emocion colectivo. Esaki gradualmente a conduci na un epidemia di melancolia na Europa. Sinembargo, e tradicion a persisti y a haci un comeback den siglo 20.
Awendia, e Carnaval di Rio na Brazil cu su bailarinnan exotico, costume y musica samba ta esun mas grandi na mundo.
E necesidad di baila, celebra y conecta cu otronan
Como ser humano, nos tin un tendencia natural pa bin hunto y celebra. Esaki ta haci nos sinti fisicamente mas saludable y mentalmente mas fuerte. Durante siglonan, carnaval tabata e miho fiestanan di baile riba caya, un excuus pa lubida nos status social y baila cu tur hende sin importa nan background.
E historia religioso inespera di carnaval ta demostra e lucha continuo entre expresa nos mes libremente y e necesidad pa religion organisa y herarkianan estricto pa restringi nos. Tal bes den e lucha aki ta unda e magia di carnaval ta existi, dunando e excuus perfecto pa bandona inhibicion, baila y conecta cu otro na un nivel mas profundo.
Con cu ta, e funcion social fuerte di carnaval ta indisputable.
