Driekonigen, miho conoci como fiesta di Tres Rey na Hulanda tradicionalmente ta wordo celebra cada 6 di januari, aunke a medida cu añanan ta transcuri e tradicion a bin desapareciendo.
Historia
Segun e historia, e tres rey ta referi na e tres rey cu a bin di Oriente, guia pa un strea briyante cu a hiba nan te Belen, unda nan a busca e baby recien naci Hesus. Nan a adora Hesus y a dun’e regalo: oro representando su naturalesa real; sencia pa su naturalesa divino; y mirra, un composicion pa fayecidonan.
Prome cu yega, nan a topa cu e malvado rey Herodes na Jerusalem, ken inteligentemente a duna nan orden pa asina cu nan bolbe, dun’e noticia di e lugar specifico unda e baby tabata, pa asina e ador’e tambe, maske su berdadero intencionnan tabata pa kita su bida.
Pero despues un angel a crusa nan caminda y a avisa e reynan tocante e gran peliger den cual Hesus di Nazaret tabata aden si nan cumpli cu e ordennan di rey Herodes, y nan no a bolbe cerca e rey ni riba e mesun caminda.
Ya cu e tres rey a hiba regalo pa baby Hesus, esaki ta e motibo cu muchanan ta ricibi regalo riba e dia aki.
Na Hulanda, Dia di Tres Rey no ta un celebracion manera ta haci na Spaña, unda e tres rey Melchor, Gaspar y Baltazar ta subi riba cabay, cu regalonan y otro tradicion. Na Hulanda nan ta pasa bishita e casnan cantando diferente cantica, y si tin a e muchanan cu ta canta, e reynan ta duna e muchanan un recompensa manera cuminda, mangel of placa.
Muchanan tambe ta bisti di rey y nan ta bay den grupo di tres pasando di porta pa porta na e casnan di e bisindario. E mini reynan ta hiba un palo cu un strea of un fox ya ta canta cantica na porta di e casnan.
Diferente religion tambe ta celebra e dia 6 di januari. Riba e mesun fecha aki tambe ta custuma di kita e kerstboom y custumber ta bisa cu si no ta kit’e, e por trece mal suerte pa e aña nobo.
Otro custumber riba e fecha aki ta pa horna un bolo di Epifania, yama “Driekoningenbrood”, “koningsbrood” of “koningentaart.” Den e bolo aki ta sconde un moneda, y na momento di come e bolo, e persona cu haya e moneda aki ta e rey di e dia en cuestion. En general, e persona afortuna aki por scoge ki wega ta hunga of bisa kico ta bay come riba e dia ey.
Sinembargo, e tradicion aki ta bin desapareciendo na algun ciudad, unda cu for di 2016 e bolo di Epifania no ta wordo traha mas. E tradicion di Tres Rey si ta continua na otro ciudadnan como Maastricht, ‘s-Hertogenbosch, Tilburg y Lierop.
Na 2012, e tres rey di Brabant a wordo reconoci como Inventario di Patrimonio Cultural Inmaterial di Hulanda.
Na Aruba, e dia aki ta uno normal unda muchanan ta bay scol. Algun cu otro lo por haya un regalo door di e tradicion di dia di Tres Rey, pero maske tin algun famia na Aruba cu si ta observa e tradicion aki, e no ta un dia oficial pa Aruba. Algun famia den bario usualmente ta bin hunto pa kima kerstboom.
