Despues di un trabou di renobacion di casi un aña a inaugura E Faro di California oficialmente, ayera tardi. Gobernador di Aruba, Sr. Fredis Refunjol hunto cu Minister di Cultura, Sr. Otmar Oduber, a realisa e acto di cortamento di cinta den presencia di un grupo di invitado.
Durante un presentacion, directora di Monumentenfonds Aruba, Sra. Anne Witsenburg a bisa cu e proyecto aki tabata esun mas importante cu nan a yega di realisa den e ultimo cuater aña, ya cu E Faro ta icono di pais Aruba.
Entrante 5 di september lo cuminsa ofrece tour pa subi E Faro, y asina e bishitante por haya un bista panoramico di e sitio bunita aki. E Faro Blanco Restaurant a tuma e reto di tuma e operacion di E Faro, y ya caba nan a introduci nan prome guia turistico y e persona encarga cu e operacion aki. Tambe Aruba Bank ta ofrece bishita gratis pa nan clientenan. Ocho hende so por subi pa 15 minuut na e mesun momento.
