Un exodo masivo di Venezolano ta menasa pa interumpi e comunidad di e islanan ABC. Sinembargo, e gobierno Hulandes no a tum’e suficiente na serio e preocupacionnan di e islanan.
Esaki ta segun e miembronan di parlamento di Aruba. Recientemente nan tabata na Hulanda y e union Europeo pa asina presiona pa obtene apoyo financiero pa e recepcion di refugiadonan Venezolano.
Nan ta bisa cu ta straño cu Hulanda a duna Colombia 4 miyon di Euro pa e recepcion di refugiado. Mientras cu e islanan ABC te cu awo solo tin cu wak con cu e asistencia tecnico, a pesar di varios solicitud di asistencia. E politiconan Arubiano ta yama e crisis Venezolano un asunto di reino.
