Di biba cu luz di kerosin te scoge pelicula riba Netflix. Di cana cu pargati te combersa cu nietonan cara a cara via un smart phone. Esaki ta locual welanan di Aruba a experiencia den un periodo relativamente cortico.
Awe riba Dia Internacional di Hende Muhe ta enfoca riba e contribucion di e generacion di hende muhe cu awe ta considera ‘hendenan grandi.’ Pero e grupo ta uno hopi diverso, un cu mas reto cu otro. Pero tur tin algo en comun. Nan a experiencia un desaroyo rapido, di cultura, di percepcion, entre otro debi na tecnologia cu a trece hopi cambio.
E generacion di hende muhe Arubiano cu a nace durante y despues di e di Dos Guera Mundial a mira nan posicion na Aruba evoluciona di amanan di cas pa profesionalnan. Un grupo grandi di e generacion aki a bira e prome grupo di hende muhe Arubiano cu a bay scol y a traha nan carera, sea como docente, trahadonan di oficina, trahadonan den benta. Cu e cambio aki, hopi di e generacion aki a dicidi tambe pa haya menos yiu, pero a sigui confronta e responsabilidad di ta esnan cu mester a lanta nan yiu, hopi biaha nan so. Pero ta di e grupo aki a nace e activistanan pa mehoracion social, igualdad di derecho.
Mescos cu nan a mira tecnologia desaroya, e grupo di dama Arubiano cu awor ta e pensionadonan a desaroya di ta unicamente e wela cu semper ta na cas pa cuida nieto of hasta bisnieto. Esnan cu a logra yega e edad halto cu salud, ta damanan cu ta hopi consciente di unda nan a bin y cuanto potencial nan yiu muhe, nieta y bisnieta tin danki na entre otro nan mesun esfuerso. Y ta hende muhe cu ainda ta aspira pa mas conocemento, y como tal, ta hasta dispuesto pa siña con pa maneha un telefon sabi,’ pasobra keda sin crece no ta un opcion pa nan.
Riba potret ilustrativo: Maria Francisca Jose-Pimentel, conoci como ‘Chica’ (91), kende pa mas di 28 aña a traha como boluntario na Fundacion pa Nos Grandinan, Club Kibrahacha. Sra. Jose-Pimentel no tabata involucra den e relato aki.
