Diahuebs mainta e reunionnan cu stakeholders en conexion cu formacion di Gabinete Wever-Croes a continua. A reuni cu Banco Central y cu AHATA. Ambos reunion a bay bon cu intercambio di informacionnan.
Segun un comunicado di prensa di gobierno, Sra. Jane Semeleer di Banco Central a enfatisa hopi riba nos fundeshi monetario financiero pero tambe riba e desaroyo economico y unda gobierno kier hiba Aruba den e siguiente añanan.
“Akinan nos no ta papia caba di ‘business as usual’ pasobra esey lo ta algo cu no ta factibel mas. Mi ta kere e pandemia a siña nos tur esey y con nos ta transforma nos modelo economico pa asina cada ciudadano por crea su propio progreso y bienestar”.
Cu sra. Tisa LaSorte di AHATA a toca e tema cu ta di relevancia cu turismo. Indudablemente AHATA a trece tambe padilanti e importancia di participacion di gobierno den e sector aki. Reforma fiscal tambe ta un tema cu a wordo trata. Tambe a pidi atencion pa temanan urgente manera e status di nos planta di RWZI, problematica di UTV/ATV, temanan di ley laboral y recomendacionanan pa BTW of e tipo di reforma fiscal.
“Mi tin cu bisa cu tur dos reunion a bay positivo. No solamente conseho a wordo duna sino tambe hopi indicacion cu puntonan similar cu nos por uza como gobierno nobo den nos acuerdo di gobernacion. Esey ta mi meta di e reunionnan aki”.
E dos reunionnan di diahuebs ta e ultimonan pa e siman aki debi na otro compromiso di Prome Minister. Di diabierna pa awor a reuni cu 35 stakeholders. E reunionnan a tuma luga di e forma mas transparente posibel na unda a pidi e stakeholders pa duna un declaracion na prensa depsues di cada reunion y contesta e preguntanan cu prensa a prepara pa nan.
“Nos ta aprecia e papel importante cu prensa ta hungando den e parti aki di formacion di Gabinete Wever-Croes, treciendo tur e informacion aki padilanti pa pueblo por ta bon informa di tur detaye cu ta wordo treci den e reunionnan cu stakeholders”, Prome Minister Evelyn Wever-Croes a termina bisando.
