Economia no ta cana asina tremendo, tur indicacion pa esey, t’ey. Nos ta creciendo un misero 1% e aña aki, y miho nos drecha e asunto aki, sino tin problema mas grandi ta warda nos. Esey ta mas o menos e mensahe cu nos a keda cu esaki, despues di e tratamento di presupuesto 2018 den parlamento. E fraccionnan di e coalicion a keda satisfecho, mientras cu oposicion no asina tanto, loke ta logico pasobra nan lo a hacie diferente. Loke nos no ta comprende completamente, pasobra nan tambe lo mester a atende un situacion, cu no ta loke nan ta pretende cu e tabata, ora nan a cera porta di gobernacion nan tras. Pues cu e gabinete nobo ta purba reparti e daño entre algun aña pa ta manehabel, ta di comprende.

Pero tin un asunto mas fundamental, cu ta toca e mero curason di nos administracion nacional y esun gubernamental. Si nos mira atras algun aña, nos lo ripara cu no tabatin tanto crecemento economico. Un aña si, un aña no, esey tabata e tendencia di crecemento economico di ultimo añanan. Pero loke si a keda crece constantemente, ta e fluho di placa cu ta bay pa gobernacion, den su totalidad, no solamente loke gobierno central ta haya pa arma su presupuesto. Nos ta papia aki concretamente di e Consolidated General Government cu ta e presupuestonan di gobierno, y di e fondonan di seguro social y medico, esta SVb y AZV. Loke nos por mira aki ta cu durante e ultimo añanan, a pesar cu economia tabata lidia pa mustra bon, tabatin un crecemento continuo den loke conhuntamente ta saca for di economia, o pio ainda, ta fia pa por gasta.

Por ehemplo, na 2014 ainda conhuntamente e entidadnan aki tabata na un nivel di gasto di Afl. 1.939 miyon, y na 2018 esaki ta Afl. 2.258 miyon, un solido Afl. 319 miyon mas cu na 2014. Pero, den e mesun añanan ey, nos Producto Interno Bruto (BIP; GDP) a crece di Afl. 4.743 miyon te Afl. 4.903 miyon e aña aki, si cos bay bon. Un diferencia di apenas Afl. 160 miyon. Na 2014 nos tabata mira 40,8% di nos GDP bay na e gobernacion amplio aki, y na 2018 nos ta entregando no menos cu 46,05% na e entidadnan aki. Nos ta na caminda pa entrega 50% limpi di nos GDP na e gobernacion amplio aki? Si no tin manera pa para esaki, ta ey nos ta bay.

Ta interesante tira un bista tambe riba e gastonan di personal di e total aki. Na 2014 a gasta conhuntamente Afl. 745 miyon na personal, di cual Afl. 722 miyon tabata di gobierno central. Na 2018 ta bay na personal en total Afl. 780,9 miyon, di cual Afl. 728,5 miyon ta pa cuenta di gobierno central. Esaki ta implica cu gasto di personal na AZV y SVb a subi cu mas di 52 miyon florin? Esaki ta loke e cifranan aki ta bisa, pero nan no ta di nos propio fabricacion, pero ta resulta ora nos pone e diferente consehonan anual riba presupuesto di Conseho Consultativo banda di otro. Nos ta contento cu tur aña nos por conta cu henter e operacion cu esaki ta tuma nan pa haci, pa por tin e bista total aki riba gobernacion y nos economia.

Awor, nos ta comprende cu di basta rato caba ta bin e pregunta: “OK, pero kico boso kier bisa nos cu tur esaki?” Loke ta bira obvio, a lo menos, esey nos ta pensa, cu no por sigui eternamente den e direccion cu nos ta bay. Y a proposito, no mester lubida cu nos tin ainda e pension obligatorio pa sector priva, cu en principio ta saca como 6% di tur salario for di circulacion. Pa un bon motibo, pero tambe ta placa cu no ta disponibel pa consumo directo.

E problema no ta asina grandi, si nos tabatin un economia cu ta crece constantemente cu varios % pa aña. Pero cual pais na mundo por garantisa esey? Anto nos riba e isla chikito aki, cu realmente mester count our blessings cu nos tin un turismo solido, mester kere den e filosofia cu nunca economia lo stop di crece? No ta net aki nos ta toca e problema mundial general, cu mescos Aruba, hasta mundo tin su limitenan? Y kico ta parce e escogencia logico? Cu gobernacion den su totalidad mester bay costa nos menos placa. Y un paso obvio ta contempla e gastonan di personal, unda cu mas uzo di medionan digital, mester ta posibel logra haci mes hopi, of mas trabao, cu menos hende.

Esaki no tin absolutamente nada di haci cu sentimento, cu nos lo tin rabia riba e baca sagrado di gobernacion, pero simplemente cu maneho adecua di e pais aki, cu no ta solamente asunto di esunnan cu ta labora eyden, pero di nos tur cu ta contribui. Loke nos a mira siman pasa, ta un discusion bunita, hopi biaha al caso tambe, pero aki ta unda ni gobierno, ni oposicion kier rock the boat. Pero e dia no ta leu, cu si nos mester contempla e realidad aki nos dilanti.