Mirando cu esaki ta bay ta e ultimo fin di siman di Carnaval 69 na unda diasabra ta bay tuma luga e parada grandi na San Nicolas y diadomingo esun di Oranjestad cu e participacion di varios grupo cu miles di participante y publico en general, ta bin dilanti e pregunta: ta indispensabel pa mayornan bay cu nan yiu chikito?

Bon Dia Aruba un biaha mas ta trece e topico aki ya cu den ultimo paradanan por a mira con mayornan ta pone nan deseo di bay wak e carnaval prome cu e responsabilidad di cuida nan mesun yiu. Esaki por tin diferente motibo como pa disfruta di e parada, comparti cu amigonan y entre otro, dal drinks loke na final no ta algo responsabel na momento di bay na e actividad grandi aki cu un mucha chikito.

Un di e factornan cu por tin efectonan negativo riba nos muchanan na ora di asisti na un parada di carnaval ta cu e actividad ta dura hopi ora na unda e por cansa cu e solo cayente y e por causa molester na su horeanan door di zonidonan fuerte di e bandanan. Tin multitud di hende cu e unico cos cu nan ta pendiente di dje ta di disfruta e momento uzando alcohol.

Di otro banda tambe ta conoci cu Fundacion pa nos Muchanan tin un lista pa mayornan hiba nan yiu na un centro di cuido mientras nan ta asisti na e parada y asina nan keda mas trankilo y e mucha mas sigur.

E mesun mayornan por acerca e luganan ey pa wak si ta confortabel of sigur pa laga nan yiu durante nan asistencia pa e parada y e programacion cu nan tin di actividad cu muchanan lo bay haci. Si tin un familiar cu no ta bay carnaval, e por cuida e mucha y si e mucha ta confortabel pa keda eynan, pasobra ta un persona cu e conoce y ta sinti su mes sigur. Si no tin opcion, e ora e fundacion tin e lista.

Ademas, esaki ta responsabilidad di cada mayor. Muchanan chikito no por keda pa oranan largo pa warda riba un parada, y pa e motibo aki nan tin diferente informacion y tambe posternan riba e fundacionnan cu ta duna e mayornan e informacion necesario pa zorg pa muchanan por ta proteha durante temporada di carnaval.

Tambe Centro di Cuido y Famia a trece dilanti den dianan aki diferente tips pa un temporada di carnaval sano pa tur manera muchanan bao di 5 aña no bay parada. Esnan mas grandi cu si ta bay mester tin un stoel pa sinta y descansa, proteha na oido cu earplugs, hunta sunblock y pone e mucha den sombra. Semper mester tira un bista riba e mucha, dun’e hopi awa y cuminda saludabel, bisti nan cu paña fresco y pone un pechi pa solo.

Si muchanan ta asisti pa un grupo den parada, ta importante cu mayornan mester ta informa si e grupo tin un baño, si muchanan tin alimentacion, si tin un number di emergencia y si nan ta zorg pa tin un caha di emergencia pa motibo cu muchanan lo por cay durante e parada.

Carnaval ta un fiesta di alegria tanto pa adulto como pa e muchanan, ta importante pa menciona den actividadnan asina grandi unda muchanan ta asisti pa nan keda e prioridad. Muchanan no mag di keda te oranan laat riba caya, mas ainda sabiendo cu dia despues nan tin scol, nan mester di nan soño pa por bay scol nan tempo y descansa.

Na Aruba, alcohol ta sigui como un di e prome causa di e problemanan social. Pa e motibo aki tampoco ta conveniente pa muchanan asisti na un evento na unda mayoria di hende ta consumi alcohol ya cu por origina un situacion lamentabel, tanto pa e mucha como pa e mayor.