E cosnan ‘normal’… Cu no por bay normal…?

Un fin di siman marca pa interupcion di coriente. Ta resolve e problema, den cierto caso te den oranan di marduga, y ta duna un rueda di prensa cu un bunita splicacion. Fin di e cuento, lo nos bisa… pero no, ata otra interupcion pa cual segun nos ta tende, ta debi na fayo cerca e compania ruman. Esey ya caba ta un bon motibo pa pone tur dos den un compania, anto e ora ta e mesun gerencia lo tabata responsable. Pero enfin, tanten esey no sucede, nos ta keda cu dos posible ‘culpable’.

Pregunta cu semper ta keda sin contesta, ta pakico no ta preveni cierto problema. Naturalmente lo tin esnan cu ta core bisa cu ‘problema semper por sucede’ o ‘eror ta algo humano’, y aunke tur esey por ta berdad, den un situacion manera di fayo grandi di infrastructura vital manera electricidad, awa, y telecomunicacion e tipo di expresion ey no ta satisface. No cu den e caso di e fin di siman aki no a trata di splica e asunto di un manera mas aceptable, al contrario. Cu e esey un banda, ta necesario pa duna e incidentenan aki, un atencion mas profundo.

Ta remarcable cu e problemanan ta cuminza na momento cu nos ta drenta temporada mas cayente di aña. Esey ta haci cu consumo di coriente, y awa, ta subi considerablemente. Y ta di supone cu ta tene debido cuenta cu esey. Nos por ta sigur cu esey ta sucediendo? No ta asina facil pa averigua si esey ta e caso, y nos no gusta duna impresion cu tin cos cu no ta bay bon, sin conoce e trasfondo. Sin embargo, nos a keda cu algun pregunta. Pa cuminza, nos tin suficiente capacidad di reserva na e momento aki? E propio website di WEB Aruba NV ta indica cu no tin produccion di energia solar di e parke riba tereno di Refineria di Aruba NV. Di repente no ta haci nada mas di esey? Nos por confia cu tur material necesario pa brinda e servicio necesario ta disponible?

Nos sa cu e companianan concerni a pasa den mal tempo aña pasa. For di publicacion di Banco Central por conclui cu na 2020 consumo di tanto awa como electricidad a cay hopi. A produci como 1,5 miyon metro cubico menos di awa na 2020, compara cu 2019. Tabatin un consumo di electricidad cu a cay di mas di 800 miyon KWh pa 742 miyon KWh. Esakinan ta golpi grandi di miyones. Y ta di spera cu nan a logra pone placa un banda pa haci e inversionnan necesario pa keda duna servicio adecua. Pasobra nan no t’ey na promer lugar pa produci dividendo, pero pa percura cu e servicionan vital aki ta continua den bon forma. Na su debido tempo nos lo haya sa cuanto exactamente e perdidanan aki tabata, por lo menos den e caso di WEB, pasobra nan tin e decencia di pone e doñonan di WEB, supuestamente anos, pueblo, na altura. Di e otro, NV Elmar, nos no sa pasobra nan ta pertenece na e gran lista di entidad estatal o semi-estatal cu no ta duna cara cu nan cuenta anual y nan supuesto supervisor, Pais Aruba, manera semper tambe ta keda den silencio riba e tema aki.

En todo caso, a pesar di e incertidumbre entorno e asunto aki, nos mester keda preocupa pasobra Aruba tin un track record fatal ora ta trata di mantenimento di propiedad publico. Por ta cu hasta nos mester conclui cu e dos empresanan aki di awa y electricidad no ta den e categoria mas preocupante, pero esey ta bisa hopi di e resto. Tuma por ehemplo mantenimento di caretera. Nos a haya en berdad un ringweg nobo, cu ta hopi util, a pesar di su fayonan cu no ta haya reparacion, manera e piscina enorme cu ta forma riba e seccion entre Ponton y Bushiri, unda poco genio di ingenieria a dicidi cu nos ta traha contra ley di naturaleza na Aruba y cu awa por core bay laira envez di abao. Pero por lo demas nos tin un cantidad di caminda cu ta un desastre, cu cada vez cu nan logra haya un tiki asfalt nan ta core tapa un buraco aki aya, pa nos no haya zundra di mas. Nos tin planta di purificacion na werki y no ta mira nada ta move. Nos tin un sinfin di edificio di ‘nos’ (Pais Aruba) ta para putri sin un solucion.

Ora critica cuminza aumenta, ta bin cu e argumento cu ‘no tin placa’. Esey ta e berdad, sunu, y hasta mas cu esey: e ta tipifica e situacion cu nos ta tolera den e pais aki. Nan ta gastando asina hopi placa cu paga hende di mas pa ken no tin trabao (util), y nos ta paga asina hopi na interes riba debe, cu nos no tin placa pa haci e cosnan ‘normal’ cu ta spera di cualkier gobierno na mundo. Haci e cosnan ‘normal’ promer, anto despues ta mira si a keda placa pa ‘adorno’. Pero aki na Aruba nos tin gobierno(nan) cu ta custumbra traha pa robez, y ta ora pa pone un fin na e maneho aki. Cu ‘ayudo’ Hulandes si mester, pero si nos tin un tiki berguensa colectivo, ‘nos mes por’…