E cosnan cu no ta… Aparece den negociacion…

Aruba, fin di 2024, rumbo pa 2025 y despues. Rumbo pa 1,5 miyon bishitante cu ta keda un siman, rumbo pa 100.000 vehiculo priva riba caminda, rumbo pa 140.000 habitante, rumbo pa fila riba cada rotonde na cualkier ora…?

Mientras e principal partidonan politico ta delibera cu otro pa percura cu nos pais tin un gobierno pa e proximo 4 aña, tin varios pregunta cu ta yega hopi mas leu cu loke nos por deduci cu nan ta delibera, tirando un mirada riba e plannan di gobernacion di e diferente partidonan. Riba su mes, esey no ta nada straño pasobra e plannan ta indica solamente un resumen di loke nan ta propone. Pero nos no mester warda te dia nan presenta mas detaye pa mira si en berdad nan ta propone solucion sensato; nos mes por analiza awor caba.

E preocupacionnan presenta na inicio di e Editorial aki, ta encera djis un parti di e asuntonan cu nos mester atende den e proximo tempo. E preocupacionnan aki no ta tema reciente, por ehemplo ta 20 aña pasa cu a lanza e proyecto di ‘Carrying Capacity’, cu lamentablemente a keda benta un banda pa e gobernantenan iresponsable cu tin mas di 20 aña ta ignora tur advertencia di experto, y a cera nan curpa paden cu nan ‘personanan di confianza’, pa crea un Aruba cu nos no a pidi, pero nan si tabata desea, pasobra esey tabata y ta ainda, e modelo politico pa gana placa. Y e afan politico aki, cu ta grandemente presente ainda, a hiba nos na ignora e hechonan mas visible di nos existencia. Por ehemplo, cu nos ta den e categoria di isla chikito den Caribe, cu 70 km di costa y 180 km cuadra, pero den turismo ta den e categoria di e islanan grandi cu ta ricibi miyones di bishitante pa aña… Republica Dominicana ta haya mas di 6 miyon turista stayover, pero tin 11 miyon habitante, mas di 48.000 km cuadra y 1600 km di costa… Nan tin sin embargo apenas 4 biaha mas bishitante cu nos.

Ta straño anto cu nos tin cierto problema cu ta exigi solucion pronto, y cu nos no ta mira den ningun programa politico? Por ehemplo; nos no ta mira e problemanan den trafico, cu a aumenta drasticamente den ultimo añanan, cu un crecemento te 90.000 auto priva? Kico lo mester ta e pensamento sano cu nos mester por spera di cualkier politico cu a yega di tende di e palabra ‘planificacion’? Cu lo mester bin un solucion, no pa mehora sino ‘re-inventa’ transporte publico, pa por bira un alternativa real pa e transporte individual, cu den e forma actual no por sigui crece.

Si bo tin 100.000 vehiculo priva, bo tin un fila stanca di 500 km, si pone e autonan contra otro sin espacio meymey… Esey ta loke nos ta desea? Talvez no, pero si no ta bin ningun otro plan, ta esey lo ta e futuro. E alternativa: cumpra un ‘crossbike’ pa bo por pasa riba acera sigui bo caminda, mientras otronan ta sinta den nan auto den fila, cu e speranza cu e airconditioning ta traha bon? Esey por, pero e ta bo solucion individual; unda esun colectivo ta keda, pa cual lo paga un salario ministerial?

Te awor nos mester constata cu transporte publico ta den un situacion patetico, cu un compania moribundo si no tabata pa subsidio gubernamental, cu ta core rond gran parti di dia cu bus grandi bashi, pero cu al contrario den e oranan di mas necesidad, mainta y atardi, no tin suficiente capacidad. Tira tur e problemanan aki riba ‘management deficiente’ ta un forma masha barata pa deshaci di e problema, esey no ta e solucion y ademas no ta loke nos mester haci, cu vista pa futuro.

Nos no mester mira transporte publico solamente for di e punto di vista di reemplaza transporte individual. Den e añanan venidero, nos lo importa miles di trahador cu den gran mayoria lo haya e salarionan mas humilde, es decir hende cu poco posibilidad di cumpra y mantene un auto. Nos ta keda mantene e mentalidad di ‘sálvese quien pueda’ cu ta reina te awor, of nos ta cuminza pensa riba transporte publico bon, manehable, y pagable pa e gran mayoria cu apenas ta sobrevivi den e situacion actual? Den un anterior Editorial nos a yega di sugeri pa considera transporte publico gratis o casi gratis, na lugar di keda aumenta salario minimo, cu ta crea mas inflacion, loke no ta yuda esnan cu e ingreso mas modesto, pasobra ta nan ta sufri e consecuencianan di aumento di prijs, sigur pasobra nan necesariamente mester dedica un parti grandi di nan salario na cuminda y otro necesidad basico.

Un aspecto ironico di e asunto aki ta cu net aki, unda mester opone e consehonan Hulandes, cu ‘transporte publico mester ta rentable riba su mes’ ta algo cu ta aplicable na nan pais, den nan realidad. Nos ta biba otro realidad, cu un poblacion di mas di 100.000 plama riba 100 km2, cu na Hulanda ta biba den un ciudad di 25 km2. Bo no por organiza infrastructura, y sigur no transporte publico, di mesun manera cu nan ta hacie. Pakico ora ta trata di otro asunto, e gatitonan gubernamental ta bira de repente ‘leon’ riba Hulanda, pero ora cu nan razon lo mester mustra ‘orguyo Arubano’, nan falta tanto e conocemento como e curashi pa ‘think outside the box’, loke nos mester pa cuminza defini e futuro cu Aruba realmente merece. Apenas un di e tanto problemanan no atendi…