E cosnan cu gobierno no ta haci pa nos

Despues di tur e debatenan di ultimo tempo riba tur sorto di asunto cu gobierno mester regla pa nos, alrededor di presupuesto, pero tambe riba nan mes, un hende por keda cansa di tanto papia. Anto ta parce cu nos no ta avansa tampoco. Un simpel expresion di e actual ministro encarga cu husticia tocante eventual cooperacion cu Marina Hulandes a bira manera un tormenta, si bo scucha e comentarionan di esunnan di otro pensamento.

Hasta tabata papia di entrega di tareanan policial na militar Hulandes, cos cu segun nan absolutamente no por. Y ta berdad, esey no por y hasta ta asina cu esun cu bay pidi autoridadnan Hulandes pa e move aki, lo haya un contesta bon cla cu no ta mira pakico militar Hulandes lo mester haci trabao di polis na Aruba. Militar Hulandes t’ey, entre otro, pa ora e otro cuerpo uniforma ta collapse y tin un bashi di poder. Ban spera cu esey nunca yega asina leu.

For di declaracion posterior di e ministro por comprende cu e nunca lo a pretende esey tampoco, pero ta trata simplemente di sinta hunto anto analisa unda colaboracion por duna mas fruto, mirando e situacion actual di peligro for di otro banda di lama, algo masha logico. Finalmente, henter e asunto aki a resulta di no ta mas cu un tormenta, pero esun cu na bon Hulandes yama ‘een storm in een glas water…’

Aunke, awor diripiente ta surgi e discusion atrobe cu mester un radar. Bunita, nos a sinta papia te fada den parlamento algun dia pasa, y nos no a tende un mocion pa hinca varios miyon den un sistema di radar, si e tabata asina importante. Pakico nos politiconan ta asina bon den discusion inutil despues cu nan a laga nan turno pa papia pasa? Ademas, si e radar no ta den presupuesto, hasta si nos por ta di acuerdo cu otro cu e lo ta hopi util, nos no ta den tempo di crisis financiero mas? Asina leu cu nos ta sigui noticia, y ta comprende un poco e reglanan basico di economia y maneho financiero, ta awor no mas nos ta cuminsa riba e caminda largo di reparacion financiero, cu tin como consecuencia logico cu lo bay tin hopi cos cu ta util, hasta necesario, pero cu nos no ta bay haci pasobra tin otro prioridad. Y kico ta prioridad?

Pa nos, e asuntonan cu ta encera e bienestar di e ciudadano. Y den esey na prome luga e situacion di e gruponan mas vulnerabel den comunidad. Un di e asuntonan pakico si a pone placa riba presupuesto ta pa traha rapidamente riba esaki. Nos ta haya cu nos no ta tende tanto di e cosnan cu mester a sucede caba, y cu ni sikiera ta costa placa. Manera cuminsa indica comunidad unda nan mester bay den caso di abuso di mucha. Ken ta responsabel pa kico? Of por ta cu despues cu supuestamente tur e instancianan a sinta hunto, ainda nan no por ni informa comunidad kico ta kico pa e simple prome pasonan den e proceso? Y no bin bisa nos cu awor cu caha di gobierno a habri, anto por cuminsa gasta placa pa informacion na publico. Nos ta traha den prensa y sa cuanto informacion ta gratis: simplemente saca bo informacion y prensa en general ta mas cu dispuesto pa publica tur cos. Pero laga nos supone cu, manera semper, ‘nan ta bezig’, ainda. Pero no laga nos keha solamente cu gobernacion ta disfuncional y lento.

Tin otro asunto cu tambe mester atencion, di gobernacion tambe, pero unda felizmente nos mes tambe ta actor. Hasta asunto cu nos mester ta actor, pasobra ta trata di nos propio curpa. Hopi a papia y skirbi caba tocante e efecto dramatico cu nos custumbernan di alimentacion tin riba nos salud, pero tambe riba nos felicidad personal. Pues aki no ta trata na prome luga di wak kico gobierno ta bay haci o lo mester haci, pero kico nos mes ta haci. Ki dia nos ta cuminsa actua, no riba caya, pero den bo famia, den bo propio caso, pa hiba un bida mas saludabel? Y no bin cu e storia cu ‘nos famia semper tabata di hende fors’.

Djis tira un bista un biaha riba un potret di un klas di mucha di den añanan cincuenta… Awendia lo bo mester hopi mas meter di hanchura pa bo saca potret di e mesun cantidad di mucha… No ta bisa esaki como cos di hari. Djis imagina mucha cu no ta ni adolescente ainda,  cu ta sufri di malesanan cronico, cu muy probablemente lo causa nan morto, talvez prematuro tambe. Nos ta stima nos yiunan asina hopi cu nos ta nenga redondamente di informa nos mes tocante alimentacion saludabel, y nos ta prefera di expresa nos amor den acompaña e yiu stima den e bida dificil cu e tin su dilanti? Si nos pensa bon, tin hopi cos cu nos mes por haci, y cu no ta costa tanto placa; e ta mas un asunto di voluntad. Ban exigi cu gobierno ta haci su parti, pero nos mes no por keda atras.