Diaranson anochi e di cinco version di Aruba Symphony Festival & Academy a tene su apertura exitoso cu presencia di Gobernador interino, Yvonne Laclé-Dirksz, y un gran cantidad di publico na Cas di Cultura.

E soprano Tica Giel kende aparece riba podium di Cas di Cultura cu e coro di muchanan di St. Anna School y e coro femenino “Den Harmonia”, a habri e festival aki cu nos himno nacional Aruba Dushi Tera.

Despues e pianista Venezolano Edith Peña a toca e obra KV 265 di W. A. Mozart, Variations on the theme “Ah, vous dirai-je, maman” den C major. El a sigui esaki cu “Arpeggione” Sonata DF.821 di Frans Schubert acompaña pa Randolph Kelly riba Viola. Pa cera cu broche di oro e programa, Edith Peña y Adam Liu, chellista, a toca Cello Sonata No. 1 Op. 38 di J. Brahms.

Reconocimento
 Den e cuadro di celebracion di e di cinco edicion di Aruba Symphony Festiva, directora di Aruba Tourism Authority(ATA), Ronella Tjin Asjoe-Croes a haci entrega di e reconocimento den forma di premio ‘Distinguished visitor ambassador award,” na e director artistico di e festival aki, Simon Gollo.

Tjin Asjoe-Croes a laga sa cu di manera constante ATA ta reconoce bishitantenan kendenan a haci di Aruba su segundo hogar. “Nan ta berdadero embahadornan di Aruba y awe nochi ta un honor pa mi duna sr. Gollo, danki pa su amor pa Aruba reconociendo,” asina directora di ATA a bisa na momento cu a otorga e premio aki.

El a haci un reseña di e bida artistico y profesional di e violinista y director, Simon Gollo. El a bisa cu e musico Gollo ta originalmente di Maracaibo (Venezuela), pero el a studia musica na Alemania y Switzerland.

El a funda Nuevo Mundo Festival na Maracaibo, unda e festival a keda pa 12 aña. Pa hopi aña caba e musico Gollo a aporta na nos isla tocando den conciertonan y haciendo donacionnan importante pa diferente instancia, manera Aruba Scholarship foundation y dunando klasnan gratis y master clases pa hobennan di nos comunidad y rond mundo.

Gollo a asisti na incontabel y importante scenarionan rond mundo. Y awor pa medio di e festival aki cu ta na Aruba, e ta busca incentiva e musiconan hoben y purbando di posesiona Aruba manera un centro musical y cultural.

Durante su discurso, Tjin Asjoe-Croes a bisa cu pa e proximo 10 dia nos lo mira Gollo su soño continua, mientras nos comunidad y bishitantenan lo por disfruta di un serie di concierto cu ta conta cu presencia di alrededor de 100 musico conoci y di renombre mundial kende lo duna les na studiantenan di diferente parti di mundo.

Un soño
E musico Simon Gollo kende tabata masha emociona y gradici pa e premio otorga pa ATA, a laga sa cu nan a cuminsa e festival aki na Aruba, no ta solamente pasobra e tabata su soño. “Sino cu e ta e soño di hopi hende na Aruba cu ta soña di mira su yiunan tocando den orkestanan reconoci. Pero tambe di mira su isla no solamente como un ‘Happy Island,’ pero como un centro de referencia cultural y musical,” el a bisa.

Igualmente el a reconoce cu e soño aki no tabata posibel nunca sin e apoyo di entre otro Clyde Harms y hopi otro hende cu a duna nan apoyo for di cuminsamento. Tambe el a laga sa cu ta su soño tambe di mira un Cas di Cultura renoba cu Aruba ta merece. Unda den un forma di joke el a bisa cu nos lo por pone un faro unda nos lo por wak Venezuela. Na final e musico a declara cu nan ta spera cu e festival aki por bira un referencia pa Aruba, pa asina e hendenan por papia di Aruba como un isla musical tambe.

Te dia 27 di juli venidero Aruba ta escenario di e presentacion di musiconan internacional y studiantenan di mas cu 15 pais y virtuoso den diferente instrumento.

Awe nochi – Ocho maestro y Ocho instrumento musical na Cas di Cultura
E programa ta cuminsa awe nochi cu Trio for Trumpet, Violin And Piano. “Sonata” di E. Ewazen Carl Cranmer, piano; Olivier Piguet, fiyo; Jean C. Dobrzelewski, trompet. Ta sigui Adam Liu cu su cello tocando e Suite No. 4 in Eb Mayor BWV 1010 di J. S. Bach.

Pa esunnan cu tabatin e privilegio di scucha sr. Liu diaranson anochi, esaki lo ta un treat delicioso. E programa ta termina cu e quinteto consistiendo di Meghan Woodard riba oboe; Boja Kragulj, clarinet; Olivier Piguet, fiyo; Randolph Kelly, viola, y George Amorim tocando su contrabajo. Maestronan di nivel mundial! E concierto lo cuminsa 8pm den sala grandi di Cas di Cultura.