Na Aruba, regularmente ciudadanonan ta bati alarma pa cacho y pushi cu a keda bandona den nan bario. Tin biaha, hende ta bandona nan mascota banda di un caminda grandi, of hasta den mondi. Pero abandono di mascota tin consecuencianan profundo pa e animalnan bandona, como tambe pa comunidad.

Segun un articulo di organisacion global pa bienestar pa animalnan bao influencia directo di humano, Four Paws, abandono ta expone cacho y pushi na un destino incierto. Riba caya, nan mester busca pa nan mes y por sufri di hamber, sed, lesion y malesa. Tambe nan por haya stress y confusion pasobra nan doño a laga nan riba nan mes den un lugar cu nan no ta conoce.

Ademas, bandona animalnan tin consecuencia pa e comunidad, consecuencianan cu cual no tur ora hende ta tene cuenta: E animalnan por ta un riesgo pa seguridad den trafico si nan core dilanti auto buscando pa nan doño. Pasobra hopi biaha, pa dianan largo ta conoci cu e cacho of pushi ta keda purba di yega cas back of haya nan doño back, ya cu animalnan si tin lealtad. Pues ta un acto cruel. Ademas, e animalnan por bira un problema pa e bario den cual ta bandona nan, mientras nan ta busca cuminda, ta blaf otro cacho of hasta por morde un hende pa motibo cu nan ta sinti insigur.

Animalnan bandona ta enfrenta un futuro incierto y cu stress

E destino di mascotanan bandona casi semper ta tragico. Por ta un doño cu a haya su mes den un emergencia por pensa cu ta mas humano pa bandona e mascota riba caya en bes di dun’e hangua of hib’e “kill cage.” Pero segun Four Paws, esaki no ta e caso.

Mientras cu algun mascota por keda rescata pa un animal shelter of fundacion, pa autoridadnan of pa hende cu bon curason cu por tuma nan, mayoria no tin e suerte aki sino cu ta keda biba riba caya den miedo constante, forsa pa cuida nan mes.

Pa puppy y baby pushi cu ainda tabata bebe lechi di nan mama na momento cu ta bandona nan, esaki casi sigur ta un sentencia di morto. Animalnan riba caya tin sed, hamber, y ta expuesto na condicionnan extremo di clima. Esaki sigur ta e caso na Aruba, unda e animal lo keda bao solo fuerte henter dia den calor, of bao awasero. Sin cuido veterinario, shelter y cuminda, e mascotanan rapidamente ta bira malo y ta muri.

Ademas, animalnan cu no ta sterilisa na momento cu ta bandona nan, tambe ta contribui na e sobrepoblacion existente di bestia riba caya, algo cu ya ta un problema grandi na Aruba. Nan cria ta nace pa un bida riba caya, luchando pa sobrevivi.

Impacto severo riba Animal Shelter y fundacionnan di rescate

Mascotanan bandona por bira un peso financiero pa organisacionnan oficial y boluntario cu ta rescata y cuida e animalitonan. Animal Shelter y organisacionnan di rescate animal casi semper ta den problema pa sobrevivi financieramente. E peso aki ta aumenta severamente pa motibo di hende cu a bandona nan mascota durante pandemia. Na Aruba, e fundacionnan no ta ricibi fondo di gobierno sino ta depende riba donacion pa por rescata y cuida e animalnan cu nan ta tuma.

Ademas di e banda financiero, na dado momento tur fundacion y shelter ta yega na su capacidad maximo di animalnan cu por tuma, y pa e motibo aki, mester haci uso di eutanasia pa controla e poblacion. Na Aruba ta un cantidad di miles di pushi y cacho cu ta ricibi eutanasia tur aña pa motibo cu no tin suficiente hogar pa tur e bestianan cu tin den shelter. Abandono di animalnan cu no ta sterilisa, manera menciona ariba, ta empeora e situacion aki.

Consecuencia emocional pa doño

Bandona un mascota por ta algo hopi doloroso pa algun doño y por tin un impacto a largo plaso. E por pusha e doño y su famia den un crisis emocional. Specialmente muchanan ta sufri ora diripiente nan ta keda sin nan mascota. Hopi hende cu a bandona nan mascota ta sinti culpa y berguensa ya cu nan a faya nan mascota, cu tabata depende riba nan y confia nan.

Consecuencia legal

Cuido inadecuado di un mascota por tin consecuencia legal. Recientemente, e caso di Khaleesi, den cual su doño a ricibi castigo di trabao comunitario y un multa pa no a cumpli cu su responsabilidad di cuido pa su cacho, a causa conmocion entre comunidad. Algo cu a destaca den e caso aki ta e responsabilidad cu e doño, A. Groeneveldt, tabatin pa cu e cacho. Esaki ta algo cu Fiscal den e caso a keda insisti riba dje y e base di e cargo di negligencia di cual a haya Groeneveldt culpable.

Abandono di mascota tambe ta un forma di huy pa responsabilidad. Un mascota ta un miembro di famia pa resto di su bida, y no por djis bandon’e. Semper por pidi ayudo y busca un solucion. Ban sea doñonan responsable.

Potret di ilustracion: Centro di Control di Cacho.