Cu esfuersonan di entre otro Javier Ras y Sue Ellen Tromp, a traha un comision special pa yuda e conocido Marlon cu un programa titula
”Un Dia Den Felicidad Di Marlontje”. Esaki a cuminsa como un simpel proyecto, y na caminda esaki a crece y bira mas grandi segun Mr.Ras ta conta Bon Dia. Ainda nan no ta un fundacion oficial segun Mr.Ras, pero e grupo cu nan a forma hunto cu aworaki ta un comision a dicidi di bini hunto pa haci algo pa yuda hendenan manera Marlon. A opta e prome biaha pa bay trip cune, dune un baño y paña nobo y despues cu a click bon cune y hunto cu e grupo cu a yuda, e idea a bin pa busca un forma cu nan por yuda Marlon bay rehabilita.
A bay acerca Marlon prome y puntre si e tabata interesa den haci esaki y e la bisa cu si y tabata enormemente contento pa cuminsa haci un cambio cu su bida. Marlon no tabata conose e cambionan nobo cu tin actualmente den caya principal na Oranjestad. E tin hopi tempo cu e no ta bini Oranjestad segun Sra.Tromp y pa e motibo aki tambe a bay dal un keiro cune den caya y mustrele tur e cosnan nobo cu ta andando actualmente manera entre otro e Linear Park.
E idea pa yuda Marlon practicamente a bini despues cu Mr.Ras a ripara tur e diferente videonan cu ta riba internet di Marlon cu e no ta haya nada humoristico di dje. E proyecto ”Un Dia Den Felicidad Di Marlontje” a inicia masomenos 3 siman atras y aworaki ta cla pa manda Marlon Hulanda dia 23 di Maart. E lo ta kedando den e stad di Heerlen caminda Stichting Nineva lo encarga di dje. E contact aki a bini for di un misa Cristian aki na Aruba kende a informa cu lo tin un centro na Hulanda y via amigonan riba Facebook a cuminsa cu e proceso pa yuda Marlon haya un luga den e centro. E centro aki ta uno Cristian y nan a ofrece Marlon un otro centro cu no ta completamente Cristian pa motibo cu Marlon mes ta prefera esaki. Inicialmente, riba ningun momento no a pensa di hiba Marlon Hulanda pa motibo cu e proyecto aki tabata solamente di ta algo di 1 dia, pero Marlon mes tabata tin e deseo di drecha su bida y bay Hulanda segun Sra.Tromp ta splica Bon Dia.
E prome parti di e programa ta dura 18 luna, despues di esaki e ta sigui cu e di dos parti di e programa na unda e lo haya su mesun cas unda e lo biba su so cu guia di e stichting.
Un di esnan trahando hunto cu e comision y ofreciendo su apoyo completo ta Astrid Vries di fundacion Aruba Human Rights For All. Ronchi de Cuba tambe ta apoyando e causa y lo bay sponsor Marlon su paña pa e bisti e dia cu e bai biaha. Trahadonan di Jewelerhuis tambe a contribui cu Marlon. Tin un cantidad di hende cu tin un stimashon enorme pa marlon. A recibi apoyo tambe for di Pastor Wilber Garcia kende a yuda recauda fondo pa cubri e resto di 25% cu tabata falta. Marlon ta super contento anto e mes kier un cambio pa su mes.
Segun Astrid Vries ta conta Bon Dia, hopi biaha nos ta exigi pa derecho humano di hende pero nos mes ta faya den cumpli cu esaki. E derecho humano mester bira e cabes y e educacion di hende riba e topico aki mester keda un prioridad pa asina nos por yuda mas hende manera Marlon.
Marlon ta un persona cu tin basta aña bringando cu problema di adiccion y no ta prome biaha cu ta purba di rehabilita. E biaha aki segun Sra.Tromp, Marlon mes kier haci un cambio cu su bida y e mes a pidi pa bay Hulanda.
