Den nos edicion di ayera, Bon Dia Aruba a reporta tocante e compania Petros cu segun relatonan den medionan di comunicacion internacional, a logra haya aprobacion di gobierno danki na otro compania, Innovasea, pa bin cu un proyecto pa cria pisca den lama habri cerca di costa di Aruba.

Bon Dia Aruba a puntra minister di Naturalesa, Ursell Arends si e compania aki a ricibi un permiso pa e proyecto y si e permiso aki lo ta mara na un ontheffing, mirando cu un proyecto asina sigur lo tin impacto riba naturalesa. Arends a indica cu no a duna ningun permiso na Petros y InnovaSea, y cu tampoco nan a pidi ningun ontheffing.

Bon Dia Aruba a investiga un poco mas riba e asunto aki, ya cu e informacion ta cu e propio fundador di Petros, Gunnar Bracelly, segun medionan internacional a papia di e proyecto aki durante un forum riba oportunidadnan di inversion y comercio Afro-Caribense, y mirando cu e comunicado di prensa tocante e proyecto aki, y e indicacion cu a ricibi aprobacion di gobierno, ainda ta riba website di e compania Innovasea.

InnovaSea

InnovaSea Systems ta basa na Boston, Merca. E compania a keda estableci na 2015 como resultado di e fusion entre OceanSpar LLC y Ocean Farm Technologies, dos proveedor di solucion pa aquacultura basa na Merca.

Na 2019, InnovaSea Systems a adkeri Vemco y HTI, dos desaroyador di herment telemetrico acustico avansa. Nan tecnologianan a ser integra den e solucionnan pa track pisca di InnovaSea.

Segun InnovaSea Systems, e compania ta den proceso pa desaroya un plataforma completamente integra di criadero riba ocean habri cu lo presenta negoshinan di aquacultura cu capacidadnan acelera pa investigacion y desaroyo, como tambe sosten avansa pa operacionnan responsable di aquacultura den lama habri.

Petros Aquaculture Operations VBA
 Petros, e otro compania menciona, ta un compania registra na Aruba bao di e nomber Petros Aquaculture Operations VBA. E ta aparece como un compania activo, registra 24 di juni di 2020. Segun su registro den Camara di Comercio, su branche ta cria di pisca y bestia di lama.

E director cu ta aparece pa Petros ta otro compania local, esta Ramiros Meatproducts VBA. E compania aki ta registra dia 20 di december 2019, y su branche ta warehouse y similar. Su doelstelling – pues e meta di e compania – ta indica den su registro di KvK como “produccion y entrega di sanger yena (“bloedworst”) y otro productonan di carni.

E pregunta ta ken ta e persona natural tras di Petros. Segun e comunicado di InnovSea ta e persona menciona, Gunnar Bracelly, kende por asumi ta e persona cu ta aparece como “directeur” y “president-bestuurder” di e compania Ramiros Meatproducts.

Bon Dia Aruba a tuma contacto cu InnovaSea pa haya mas informacion, pero te ciere di redaccion no a haya contesta.