No mester warda pa añanan di adolescencia
No mester warda pa e añanan di adolescencia pa papia cu muchanan tocante consentimento. Tin maneranan mas simpel pa cuminsa siña muchanan tocante escogencianan pa cu nan curpa.
Despues di a mira un aña turbulento pa locual ta trata abuso di mucha, e ta bon pa keda informa riba diferente maneranan cu por preveni esaki. Aunke culturalmente, hopi ta spera pa e ‘tiener jaren’ pa cuminsa papia duna muchanan un charla tocante relacionnan sexual.
Esaki por cuminsa hopi mas trempan y tin diferente metodonan con pa haci esaki.
Natalia Hamam, escritora pa ABC Health and & Well Being ta urgi mayornan pa tuma esaki na cuenta. Sra. Hamam, ta un docente specialisa den educacion sexual y disabilidad na Charles Sturt University na Merca.
Establece confiansa
Segun Sra. Hamam, consentimento sexual ta busca y duna permiso pa comete un acto sexual. E mester ta un acto di communicacion cu ta duna un ‘si, mi kier esaki’ y no solamente e ausencia di un ‘no’. E bon noticia ta cu muchanan por wordo introduci na kico ta consentimento sin cu tin cu menciona violacion sexual. Mayornan por pone e fundeshi desde trempan pa muchanan siña tocante consentimento desde tempo e muchanan tin 3 aña bay ariba y keda añadi na esaki asina e mucha cuminsa crece.
Desde no forsanan na duna un familiar un brasa ora cu nan no kier, na respeta nan stem.
Tin hopi cos cu por wordo haci. Si nan no kier duna un familiar un brasa of un sunchi por siñanan cu respet ofrece un high five of un handshake. Pero esaki por bin di otro banda tambe, siña e mucha cu e mester puntra otro hende tambe si nan kier un brasa of sunchi na luga di asumi cu e ta algo normal pa haci. Tiki tiki, por cuminsa duna e mucha confiansa pa establece su mesun escogencianan pa cu su curpa. Otro parti cu e escritora aki ta enfoca riba dje ta cu mayornan ta demonisa partinan sexual di un mucha, pa medio di duna esakinan otro nomber. E ta esencial pa e mucha sa e nomber corecto di su partinan intimo y no actua manera cu e ta algo ofensivo ora cu e mucha menciona esaki.
Duna premio
Segun Hamam tambe mester stop di duna muchanan recompensa of purba di cumpra nan cu mangel of coy hunga ora nan haci cosnan cu desde un inicio nan no kier a haci. Por ehempel ‘Si bo duna tanchi un brasa, bo ta haya un lolipop’, ya cu esaki ta manipula e mucha su sentimento inicial. Na luga di duna muchanan un premio pa un cierto accion, por dunanan un recompensa pa no kibra e reglanan familiar. Por ehempel, no bisa e mucha ‘si bo bay baña bo ta haya ijscream’, si no bisa e mucha e tin cu bay baña pasobra e ta un regla y no algo cu mester recompensa. Asina poco poco e mucha ta cuminsa comprende cu tin un structura cu cual nan tin cu trata nan curpa y no pasobra cu nan ta haya un premio.
