Awor cu e trabou di e brug nobo di Green Corridor ta birando mas visibel, un di e preguntanan ta: kico lo haci cu e brug bieu. Segun e director di e proyecto Carlos Zurieta esaki lo forma parti di un area di recreacion.
Aki un aña e proyecto di Green Corridor lo bin cla pa loke ta e caretera principal cu ta uni Oranjestad cu San Nicolas, asina e director e proyecto aki realisa pa e compania CIC (Green Infranstructure Company) ta siugra. E ta bisa cu e trabou aki ta canando debidamente segun nan cronogram y nan ta spera cu pa luna di augustus 2017 e proyecto aki lo ta disponibel pa nos comunidad.
“Esaki ta un reto cu for di principio nos a asumi cu hopi responsabilidad y nos a programa tur cos.”
E ta bisa cu e proyecto tin dos fase di entrega. E prome fase ta e entrega di e infrastructura total cu lo tuma luga na augustus 2017. E di dos fase lo tuma luga 4 luna despues na luna di december cu tin di haber cu urbanisacion, embeyecemento y via disponibel pa cana y core bicicleta. Pero cada un di nan ta marchando debidamente segun nan plan. Director Zurieta a declara cu nan a conta cu un apoyo importante di e gobierno y henter comunidad y tur cos ta canando segun nan plannan. “Tur cos ta canando segun nos cronogram.”
E ta splica cu riba e parti di e companianan di utilidad nan a haya hopi comprension y nan ta trahando conhuntamente pa logra e obhetivo aki. Tambe el a splica cu un tipo di proyecto di infrastructura asina tin dos obhetivo: E prome tin di haber cu e trafico di auto y logicamente e caretera cu ta e parti principal di e trabou aki. E di dos componente rond di e parti urbano y embeyecemento cu ta otro beneficio cu e proyecto aki ta brinda na nos comunidad.
Na Pos Chikito nan ta trahando riba e “site walk” of sitio disponibel pa e hendenan por cana sin peliger y disfruta di un area berde. Na Savaneta nan ta trahando riba e site walk y acceso na nan cas di e habitantenan. E ta bisa cu antes aunke e area ey tabata existi caba pero nan ta biniendo cu un cara nobo di urbanisacion. Tambe nan ta realisando trabou di renobacion di e site walk na San Nicolas, y tambe pariba brug specificamente den e bario di Brasil y Mabon nan a pone asfalt. Den e fase actual di e proyecto ya caba nos ta cuminsa aprecia e cambionan cu ta producto di un planificacion di tres aña pasa y di e firma di e acuerdo financiero un aña pasa entre nan compania y gobierno.
Area di recreacion
Igualmente el a laga sa cu e brug existente ta forma parti di e proyecto aki. E ta un zona di 800 meter unda e caminda existente nan ta bay adecua esaki pa recreacion di nos comunidad. E area ey nan ta bay construi un tipo di linear park cu ta parti di un ciclo-ruta cu ta inicia na altura di nos aeropuerto te cu Pos Chikito. Pero despues e via aki ta sigui pazuid. Pero tambe un area pa e hendenan por cana, tambe haci ehercicio y aprecia e medio ambiente di e lagoen aki. “E ta un icono na Aruba cu bale la pena resalta y cu e brug di auto banda di dje, e hendenan por mira esaki for di e area aki sin peliger.”
Hunto cu DOW nan ta mirando e sitionan adecua pa parkeer considerando cu e ta un autopista nan mester busca alternativa pa medio di e careteranan secundario. E director ta indica cu na ambos banda di e lagoen aki tin areanan cu nan lo por adecua como zona pa parkeer. Pero tambe e hendenan lo por yega riba nan bicicleta.
