Un regalo pa Aruba den honor di Bucuti & Tara su aniversario di 35 aña

Ta birando mas y mas dificil pa haya areanan no urbanisa na Noord, pero esey ta bai cambia pronto danki na Ewald Biemans, Grete Marie (Ree) Case, y Bucuti & Tara. Hunto nan a sponsor y doneer aproximadamente 12 hectar di tereno cu lo wordo protehi como un reserva natural pa publico y futuro generacion di Aruba por disfruta.

Preservando Aruba Pa Aruba

Como un di e ultimo propiedadnan priva den Noord cu no a wordo desaroya, e reserva natural/parke ta cuminsa dilanti di Imeldahof, ta pasa dilanti e Misa di Noord y ta extende ful te cu Scol Basico Washington. E terenonan tin enorme balor, y enbes di desaroya proyectonan di hotel, condos of restaurant, Biemans, Case y Bucuti & Tara a bini hunto pa sponsor y doneer nan propiedadnan pa nan por wordo protehi pa semper. Asina naturalesa no ta continua di wordo destrui y e comunidad di Aruba por disfruta di un parke yena di Aruba su flora y fauna nativo den e area di Noord.

The Bucuti & Tara Nature Preserve

The Bucuti & Tara Nature Preserve ta tereno protehi. Vehiculonan motorisa di cualkier tipo ta prohibi. E parke ta cas na un gran number di e 280 especie di paharito, cu ta inclui Wara Wara, Shoco, Prikichi, y otro animalnan nativo. Eventualmente, residente y turista lo por bishita e reserva cu lo tin areanan trankilo pa cana, core of sinta.

E parke su anuncio ta coincidi cu e aniversario di 35 aña di Biemans su Bucuti & Tara Beach Resort na Eagle Beach. Pa conmemora e aniversario, Bucuti & Tara ta reflexionando riba su historia. Biemans ta corda con hopi naturalesa tawata tin na Aruba ora e la muda 60 aña pasa. Cu e boom den turismo cu a resulta den su compromiso pa protehe Aruba su beyesa y naturalesa, e la converti Bucuti & Tara den un di e hotelnan di mas eco-certifica na mundo.

Un historia di conservacion y proteccion di nos medio ambiente

Biemans a establece e Comite di Medio Ambiente di AHATA (Aruba Hotel & Tourism Environmental Committee) y a cuminsa un programa yama Sponsor-Un-Miya (Sponsor-a-Mile) 30 aña pasa. E ta continua di introduci programanan di certificacion ecologico cu ta yuda otro hotelnan na Aruba cuminsa cu nan mes un procesonan di certificacion. Entre su iniciativanan mas aprecia ta su dedicacion na siña studiantenan jong con pa cuminsa cu nan mesun proyectonan empresarial y iniciativanan eco-friendly, dunando lecturanan na Universidad di Aruba, y invitando researchers, coleganan den sector turistico y studiantenan pa siña mas tocante e programa medio ambiental di e hotel. Ademas di esey, na Bucuti & Tara e ta fundamental pa solamente recomenda y incentiva huespednan pa conoce nos isla den un manera cu no ta destrui naturalesa, por ehempel door di haci excursionnan di naturalesa den Parke Arikok, enbes di haci tournan riba atvs of utvs.

E hotel ta bai continua cu su inciativanan ecologico door di yuda reforesta e parke cu nan a yuda funda. Un di e proyectonan plania ta pa planta 35 mata indigeno den honor di Bucuti su 35 aña di existencia. “Como e prome y unico hotel certifica Carbon Neutral den Caribe, awo nos trabou ta cuminsa pa cuminsa reforesta e terenonan cu matanan indigeno y traha camindanan natural y no invasivo pa hende por cana, core of sinta den parke. Den futuro, Aruba su poblacion lo por disfruta di The Bucuti & Tara Nature Preserve, cu lo wordo conoci como The Bucuti Tara – GMC Park,” Ewald Biemans, doño/CEO di Bucuti & Tara Beach Resort, ta conta. “Bucuti & Tara su aniversario ta duna nos un oportunidad pa reconoce 35 aña di impactonan positivo na Aruba su comunidad y economia. Nos ta desea di continua nos historia door di preserva Aruba su naturalesa precioso y delicado.”

Pa haya sa mas bishita www.bucuti.com.

Photo credit: Bucuti & Tara Beach Resort, Aruba.