E arte di manifestacion ta un practica cu, aunke recientemente a gana hopi popularidad, ta bay back hopi aña atras. Celebridadnan, influencers y mas ta usa e metodo aki pa logra nan metanan y cumpli tur nan soño. Pero e no ta un arte cu ta facil pa logra… Siña un poco mas di manifestacion y con abo por cuminsa cu e biahe aki.
Manifestacion, cual ta esencialmente e deseo pa bo obhetivonan bira realidad, no ta exactamente un fenomeno bieu. Basa ariba e Ley di Atraccion, manifestacion tin di haci cu e creencia cu nos pensamentonan ta energia. E concepto tin su fundamentonan den varios tradicion filosofico y religioso. Den poco palabra, manifestacion tin como obhetivo pone e individuo como e piloto di su mesun bida y ta hacie responsabel di e efectonan positivo y negativo den su bida.
E no ta un sorpresa cu despues di e ultimo dos aña durante e pandemia di COVID-19 y e restriccionnan, isolacion y dudanan pa loke ta trata salud fisico y mental a haci cu manifestacion ta experimentando un aumento den popularidad.
Por ehempel, segun un articulo di e revista Elle, buskeda di “manifesting” a aumenta constantemente ariba Google desde 2017 y a alcansa su punto maximo na juli 2020. Y den e ultimo lunanan hasta algun celebridad a confesa cu nan a manifesta nan soñonan pa nan bira realidad.
E articulo di e revista ta indica cu contrario na e creencia di “seeing is believing”, manifestacion ta basa ariba e creencia den algo pa wak e bin den bo caminda. “Manifestacion ta e capacidad di usa e poder di bo mente pa cambia y crea e realidad cu bo ta experimenta”, e coach di auto-desaroyo, Roxie Nafousi ta splica.
E idea di cuminsa bo biahe di manifestacion por haci cu bo ta haci esaki demasiado lihe, specialmente si bo no ta tuma e tempo pa sinta den trankilidad cu bo pensamentonan. Nafousi ta splica cu manifestacion ta cuminsa na momento cu un individuo tin claridad di con realmente e kier pa su bida ta y con e kier sinti den futuro. E metodo pa logra esaki ta diferente pa tur persona.
Pa yega na e liña di comienso di manifestacion tin algun punto clave cu ta hopi importante pa tene presente y asina por logra e obhetivo.
E prome punto crucial ta compronde kico bo kier manifesta. Ta hopi sigur di loke bo kier manifesta y purba di ta mas specifico cu ta posibel. Por ehempel, si bo kier manifesta mas placa, specifica cuanto placa, con e lo sinti pa tin e cantidad ey y kico bo lo haci cune.
Di dos punto ta traha riba bo mentalidad. Purba di supera cualkier creencia cu ta pone limite na bo pensamentonan y sigura cu bo mentalidad ta riba e mesun liña cu bo obhetivonan. Si di berdad bo ta desea algo, pero profundamente bo ta pensa cu bo no lo logr’e, e obhetivo ta bay aleha y no lo por bira realidad.
Punto tres, tuma medidanan sincero pa bo metanan. Haci e trabao pa yega mas cerca di bo obhetivo y laga e universo haci e resto. Expertonan ta sugeri establece obhetivonan cu ta realistico pa cumpli.
E di cuater punto importante ta e practica di gratitud. Ta agradecido pa locual cu bo tin caba y pa tur e otro cosnan cu ta na caminda pa yega na bo.
Punto number cinco ta eleva bo vibracion (vibration). Algun di e practicanan recomenda pa yuda eleva vibracion ta entre otro yoga, meditacion, ehercicio y rondona bo mes cu personanan cu ta positivo.
E ultimo punto crucial pa cuminsa cu bo biahe di manifestacion ta sea abierto y receptivo. Si bo ta cera y no dispuesto pa ricibi nada, locual cu ta bin bo caminda no lo yega. Energia positivo ta flow y den mesun hamornia e bo lo cuminsa atrae situacionnan y personanan cu lo ta den e mesun liña cu bo.
