Janelle tin 6 aña di edad y ta bishita Pasadia Bibito Pin. E pasadia ta fungi bao di SVGA (Stichting Verstandelijk Gehandicapten Aruba) y Janelle ta forma parti di un grupo chikito cu 5 otro mucha cual ta bao guia di Juffrouw Tatiana.
Na Bibito Pin cada mucha ta wordo trata y stimula individual pa asina garantisa nan desaroyo. Door di un trastorno celebral for di nacemento a haci cu Janelle no por cana su so ni papia bon. E ta wordo transporta den un stroller y mientras tanto Janelle su mama ta den combersacion cu instancianan concerni pa asina por haya un rolstoel di mucha pe. A pesar di su limitacionnan Janelle ta encanta bay Bibito Pin caminda cu e ta hunga cu e otro muchanan y durante pauze e ta core bais di tres wiel, pasobra Janelle ya caba a siña core bais. Janelle ta biba cerca su mama Janette. Rond di su cas e tin un cura masha bunita y su wela ta biba na e cas banda di nan. Dilanti di e cas tin un trapi pero un rampa a wordo traha pa asina por mobilisa cu e stroller mas facil y pronto tambe e lo por drenta cas cu su rolstoel special.
Janelle ta haya 1 bes pa siman fysiotherapie na Bibito Pin y 1 bes pa siman e ta haya therapie na cas mes. Esaki e ta haya for fisioterapistanan pedriatico di Micky’s Foundation. Akinan e ta siña para y cana cu un rollator. E rollator ta yud’e cu su balans ya cu e no tin suficiente balansa di su mes. E ta haci uso tambe di spalk pa den dia y anochi pa yuda sostene su enkelnan y yuda nan wanta den bon posicion. Janelle no por papia mucho ainda. E por bisa algun palabra los y poco poco e ta siñando mas palabra. E ta compronde hopi cos cu ta pasa rond di dje y tambe loke ta wordo bisa na dje. Pronto e lo cuminsa cu terapia logopedista na Aruba mes, pero esaki no ta wordo cubri door di AZV.
Material manera un rolstoel of un rollator mester wordo prescribi door di un dokter of specialista di hospital. Martijn Trading ta e compania encarga pa entrega e material segun condicionnan prescribi. E rolstoel si ta wordo cubri door di AZV. Spalknan tambe mester wordo prescribi door di un dokter of specialista y esakinan lo wordo traha segun midi na orthopedische instrumentmakerij van J.P. Visser.
Janette: “Ora Janelle haya therapie di Micky’s Foundation bo ta wak e entusiasmo y alegria na su cara. E terapistanan ta sali bon cune y di e manera aki por mira avancenan beneficioso cerca dje. Pa bisa berdad mi no sa con lo a para bira di Janelle si e no tawata haya e therapie nan aki for di Micky’s Foundation. Door cu e fundacion ta hasta trece ergoterapistanan y logopedista verbal na Aruba, a haci cu Janelle a avansa masha hopi mes den e area di motoriek y comunicacion pre verbal.”
Micky’s Foundation
Micky’s Foundation ta existi 7 aña caba na Aruba. E fundacion ta busca fisioterapistanan Pedriatico for di Hulanda y tambe cu frecuencia nan ta trece ergoterapista y logopedistanan verbal pa asina brinda servicio na nan clientenan. E ayudo di e specialistanan aki ta a base boluntario pero nan ta haya gastonan cubri y ta fungi como un ayudo acerca na cuido regular duna aki na Aruba.
Na Hulanda fisioterapistanan por sigui un estudio avansa (Masteropleiding) pa asina bira un fisioterapista pedriatico. Recientemente pa ergoterapistanan esaki tambe a bira un posibilidad.
Logopedistanan ta haya durante nan estudio hopi conocemento caba di con pa trata muchanan. Tur terapista cu ta traha bao di Micky’s Foundation ta specialista den nan tereno y tin e conocemento y experticio segun e obhetivo di e fundacion, cual ta trata muchanan di 0-21 aña cu tin un disabilidad fisico of mental. Na e momento aki Micky’s Foundation tin 2 fisioterapista pedriatico trahando pa un periodo di 3 luna. E tratamento ta wordo eherci na scolnan pero tambe na cas di e famia y ta wordo duna adicional na e trato cu ta wordo duna caba. E therapie cu muchanan ta haya ta completamente gratis. Pa esaki e fundacion ta depende completamente di donacion.
Pa mas informacion con pa haya ayudo pa un mucha of pa haci donacion bishita nan website www.mickysfoundation.com.
Awe riba dia Internacional di Mucha, Janelle ta nos ‘Angel di Dia’.
