Como parti di e proceso di formacion di gobierno recientemente Fundacion pa Nos Muchanan a reuni cu formadornan Gerlien Croes y Mike Eman. Manera tur otro instancia y stakeholder, durante e reunion e fundacion tabatin e oportunidad pa trece dilanti nan puntonan di prioridad y/of preocupacionnan cerca e formadornan di e gobierno nobo.

Despues di e reunion directora di Fundacion pa Nos Muchanan a duna un declaracion na miembronan di prensa den cual el a expresa cu e reunion cu e formadornan di Aruba tabata un reunion hopi fructifero. El a indica cu e puntonan cu a bin dilanti mas bien ta loke e fundacion ta eherciendo actualmente, pero tambe kico nan ta mira como futuro proyectonan of otro areanan cu lo por enfoca riba dje.

Gilkes a splica cu nan a subraya e importancia di Fundacion pa Nos Muchanan ora ta trata di ofrece diferente recurso y desaroyo profesional na e centronan di cuido di mucha, pero tambe na e mayornan mirando cu esaki ta e dos gruponan di meta primordial di e fundacion.

El a sigui splica cu durante e reunion nan a subraya tambe e importancia di e programa cu nan tin specificamente pa mayornan cu yama “Stimami Guiami” cual ta un programa cu ta specificamente pa mayornan cu tin yiunan entre edad 0 pa 4 aña. El a indica cu esaki ta un programa cu tin un enfoke di dobel generacion na unda e mayor ta participa conhuntamente cu su yiu. E mayor ta haya diferente informacion y e por practica esaki di biaha durante e programa cu e guia y sosten di e fundacion y tambe e otro personanan cu ta yuda den e programa aki.

Pa loke ta e centronan di cuido di mucha, Gilkes a indica cu Fundacion pa Nos Muchanan ta ofrece diferente tayer y tambe dia di estudio caminda cu ta enfoca riba diferente tema cu ta sumamente importante na momento cu un persona ta responsabel pa cuida un grupo di mucha.

El a splica cu mayornan tin un rol sumamente importante y banda di e mayor e centronan di cuido di mucha ta sostene e mayornan den nan rol, cual tambe ta esencial den e cuido di mucha. El a sigui splica cu un centro di cuido di mucha ta pasa hopi mas tempo cu e mucha cu e mayor mes pasobra na momento cu e mayor bin di trabou busca su yiu, e ta bay cas, e ta traha algo di come, di eynan e mucha ta bay drumi y siguiente dia e rutina ta cuminsa di nobo. Mientras cu di otro banda e centro di cuido ta pasa gran parti di dia cu e mucha. “

Pa e motibo aki ta asina importante pa nos enfoca riba nan tambe pa asina para keto riba e importancia di nos centronan di cuido di mucha pero tambe nos mayornan cu tin un trabou importante den nos comunidad,” Gilkes a bisa.

El a subraya cu ser mayor no ta facil, ora e yiu a nace e mayor no ta haya un buki cu ta splica con exactamente un mayor tin cu lanta su yiu pasobra ta den transcurso di tempo e mayor ta siña kico ta funciona y kico no ta funciona. “Cada persona ta diferente, cada mucha ta diferente y pa e motibo aki Fundacion pa Nos Muchanan su rol ta asina importante pa ofrece e sosten na e mayor, pero tambe na esnan cu ta cuida nos muchanan na un centro di cuido di mucha,” el a agrega.

Gilkes a splica cu mayornan tin reto na momento di cria un yiu y no tur ora e ta bay facil. Pa e motibo aki, el a remarca, Fundacion pa Nos Muchanan t’ey pa duna sosten na e mayornan, y pa e motibo aki tambe nan ta enfoca riba e edad di 0 pa 4 aña.

El a sigui splica cu na 2021 e fundacion a haci un investigacion cu tin como nomber “The need for Parenting Support of Parents of Children Between 0 and Five Years” unda cu a sali afo e importancia pa e enfoca riba e base.

E base, Gilkes a indica, ta cu ta cuminsa na e prome 1001 dia di e mucha su bida y pa e motibo aki e fundacion ta ofreciendo e programa “Stimami Guiami”. El a agrega cu un parti di esaki tambe ta cu mayornan ta haya diferente herment y informacion cu nan por implementa den practica pa preveni cu na momento cu un mayor tin stress of ta cansa di trabou, cu nan por haci e switch pa no baha nan rabia of stress riba nan yiu.

“E no ta facil pero e ta posibel si, entre otro den e programa “Stimami Guiami” tambe ta haya e informacionnan aki y otro tayernan cu e fundacion ta ofrece, balans entre trabou y bida familiar cu hopi mayor tin reto cune,” el a bisa.

Gilkes a menciona cu mayoria di e mayornan ta traha full time y tin mayor cu ta soltero cu ta depende riba nan mes y no tin un network social cu nan por acudi na dje na momento cu e trabou di ser mayor ta bira hopi of pisa, locual tambe tin su consecuencianan. “Pa e motibo aki ta enfoca riba prevencion. Nos ta preveni, nos ta ofrece e mayor diferente herment, conseho, guia, sosten pa asina e pregunta of e preocupacion cu nan tin no bira un problema grandi cu por resulta despues den abuso fisico of otro forma di abuso di mucha,” el a agrega.

Pa loke ta e fundacion, nan trabou y persona, Gilkes a splica cu nan tin un ekipo chikito cu ta consisti di cuater persona, cu ta inclui dos trahado pedagogisch consulent. El a remarca cu e recursonan cu nan tin nan ta purba di haci mas tanto cu ta posibel. Aunke e deseo t’ey pa yuda henter comunidad y tur mayor na Aruba, esaki no ta posibel cu e cantidad di persona cu nan tin, “pero si ta purba di haci nos best pa yega na mas tanto mayor cu ta posibel,” el a bisa.

Por ultimo el a splica cu tur aña e fundacion tin un meta, manera por ehempel, yuda cierto cantidad di mayor cu e programa “Stimami Guiami”. El a agrega cu e aña aki nan ta bay cuminsa yega na pia di trabou cu e programa pa yega na mas mayor. El a splica cu nan ta bay cuminsa hiba e programa aki na hotel mirando cu den mayoria caso ta e mayornan aki ta traha shifts of oranan largo y kisas ta liber solamente un bes pa siman y no por yega cerca e fundacion y en bes di warda pa e mayor bin cerca nan, nan ta bay unda cu e mayornan ta.