Diabierna mainta, hunto cu Korpschef, minister di Husticia y Asuntonan Social sr. Rocco Tjon, a bishita scol di Polis na San Nicolas, pa asina duna bon bini na e klas di profesional hoben cu a inicia cu nan trayecto nobo pa converti den polis.
Manera ta conoci, semper na inicio di aña, ta bishita tur e diferente warda di polis pa asina por scucha for di e personal mes kico ta e necesidadnan y retonan cu nan tin, pa asina wak con ta incorpora esakinan tambe den e plan strategico di Ministerio di Husticia y Asuntonan Social, cual ta wordo ehecuta cada aña. A inicia e trayectorio di bishita, cu Scol di Polis na San Nicolas, caminda a combersa cu e director suplente, e diferente docente y a yama bon bini na e klas nobo cu a cuminsa dia 3 di januari.
Un momento sumamente importante, mirando cu Ministerio di Husticia y Asuntonan Social ta inverti hopi den material, infrastructura pero hopi importante tambe ta pa cuminsa recluta mas personal pa e ekipo di Cuerpo Policial di Aruba, pa asina por cuminsa traha pa mitiga e falta di personal cu tin actualmente. Esaki ta e prome klas, y manera ta conoci den presupuesto di 2024 a incorpora un fondo di desaroyo, esta un groeifonds, pa asina por recluta mas personal pa henter e cadena hudicial. Na Augustus dos klas mas lo bay inicia na scol di Polis, pues e aña aki so ya caba a percura pa alrededor di 55 polis adicional wordo recluta y cuminsa cu nan opleiding.
Banda di esaki, tin diferente otro proyectonan andando, manera ta conoci ta colaborando mas cu sector priva, caminda na fin di aña pasa, a lansa e Aruba Tourism Security Patrol caminda Cuerpo Policial hunto cu sector priva, companianan di siguridad ta traha hunto pa di e forma aki brinda mas facilidad y na mes momento garantisa orden publico y mas siguridad na henter comunidad di Aruba.
Cuerpo Policial ta memey di un reogranisacion, Korpschef ta liderando henter e proceso aki, e organisacion ta bay bira uno mucho mas dinamico, e ta bay brinda mucho mas oportunidad tambe na tur esnan cu ta traha na Cuerpo Policial di Aruba. Aña pasa so alrededor di cuarenta opleiding a wordo brinda na personal, pa asina nan sigui desaroya nan mes y nan por adapta y brinda un contesta mucho miho na e demanda cu ta bin riba nan y e organisacion aki.
Por ultimo, e mandatario a expresa cu e ta sumamente satisfecho cu e prome paso, caminda a inicia cu e prome klas nobo pa Cuerpo Policial, y na Augustus 2024, cuarenta polis mas lo inicia cu nan opleiding. Hopi exito na tur nos hobennan cu e trayecto aki.
