Den nos serie di atencion pa e 17 topiconan eligi pa logra den cuadro di desaroyo sostenibel, awe topico 5 di e lista di Nacionnan Uni. Uno cu talbes nos no ta comenta tanto ariba, pero cu sigur tin su validez. Al fin y al cabo, ningun pais ta perfecto y esun di nos tampoco. Pero tin cos positivo tambe pa anuncia den cuadro di e topico aki. Igualdad entre hende homber y muhe ta un di e temanan mas discuti por lo menos durante e ultimo siglo.
Como cien aña pasa, un tempo cu no tabatin ni derecho di voto reconoci pa hende muhe den practicamente ningun pais, esaki a bira un lucha. Y logro grandi pa e sexo femenino. Despues a sigui hopi mas: acceso na enseñansa igual, pago igual pa trabao igual, igual oportunidad pa ascende y promocion den nan profesion, cu den hopi caso ainda no ta completamente cumpli rond mundo.
Nos tambe tabata parti di e desaroyo global ey, no na ultimo luga pasobra nos ta pertenece na un structura supranacional hunto cu un di e paisnan vanguardia den e cambionan aki. En todo caso ta bon pa constata cu nos no a keda pega den pasado manera varios pais ainda, unda na luga di derecho hende muhe ta sufri abuso y maltrato y unda e caminda pa yega na trato igual ta hopi largo ainda. Regularmente nos por lesa tocante e paisnan unda ainda ta existi tradicion di mutilacion genital, algo inimaginabel den nos sociedad. Pero nos no por para keto solamente na tur e excesonan cu ta existi den trato desigual den tal of cual pais, nos mester analisa kico ta e cosnan cu nos por drecha cerca nos. Un recorido, talbes no completo.
Manera bisa anteriormente, tin hopi cos cu a logra, tin biaha pa motibo di presion, den otro el a keda imponi pa legislacion. Den transcurso di tempo nos a conoce derecho di voto, igual cu e derecho di voto pa tur ciudadano, pasobra tabatin un tempo cu e ciudadano di descendencia humilde tampoco tabatin derecho di voto. Esey en bes di un derecho general tabata un privilegio di e clase mas afortuna, cu tabata considera apto pa vota y ser eligi. Esey felizmente a pasa pa pasado.
Enseñansa generalmente disponibel a trece cu ne cu automaticamente tur mucha, tambe mucha muhe, a haya acceso na educacion basico. Y den enseñansa avansa nan a pasa di un minoria pa hasta mayoria den cierto caso. Esey por parce un logro, pero e no ta asina completamente. Presencia fuerte di hende muhe den cierto tipo di enseñansa tin di haci tambe cu e fenomeno lamentabel di ‘drop outs’ masculino bao di hubentud, algo cu nos ta kere cu te awe no ta haya suficiente atencion.
Pero ban bolbe cerca e damanan pasobra ta di nan nos ta papia awe. Nan ta representa e parti fuerte di esunnan cu ta bay afo pa studia y tin un ‘rating’ mas halto di exito tambe den esaki. Tin hopi mas hende muhe ta bolbe despues di un studio exitoso cu hende homber.
Con ta para cu trabao? Aki nos por mira cu apesar di nan presencia den cantidad, hopi hende muhe no ta yega na e rangonan mas halto, ni den gobernacion, ni den sector priva. Kico por ta e obstaculonan cu ta causa esaki? Nos por pensa yen di cos pero realmente nos pais ta carece di estudio serio profesional pa nos purba surpasa e obstaculonan aki. Y como cu hende muhe ta keda relativamente atras den carera profesional, nan ta keda atras den pago pa trabao. Ademas nos no a deshaci ainda di e fenomeno di pago desigual pa trabao igual, cu realmente no tin luga pe mas den nos comunidad.
Si acaso nos yega na analisa mas di cerca e obstaculonan cu no hende muhe tin, un di nan ta sigur e peso dobel cu nan tin di trabao y famia. Aruba ta un di e paisnan na mundo cu participacion mas halto di hende muhe den proceso laboral: un exito? Sinceramente, no. E hecho cu mayoria di hende muhe ta traha, djis wak rond den bo famia, ta necesidad economico: si nan no traha tambe, nan famia no tin suficiente entrada. Esnan cu tin un bon profesion y tin un partner cu tambe tin esaki tin suerte pasobra nan tin e recurso pa paga e sosten na cas cu nan mester.
E problema grandi ta pa e grupo mayoritario di nos poblacion, unda ambos partner tin un entrada hopi mas modera y cu mester haci arte pa nan por yega fin di luna. Paga pa bon cuido pa nan yiunan ora nan ta traha, ta bira un desafio grandi pa nan. Y nos ta papia hopi biaha caba di kico ta pasa cu mucha cu ta desatendi ora scol a cera, pero ni Ma ni Pa t’ey, ainda.
Talbes nos politiconan por corda riba e aspecto aki, ora nan ta traha plan di gobernacion pa siguiente eleccion. E desigualdad cu tin peso di trabao y famia por tin solucion.
