Despues di un pauze pa atende e asunto alrededor di nos Gobernador, nos ta continua nos analisis di e 17 metanan di desaroyo sostenibel proponi pa Nacionnan Uni pa aña 2030. E biaha aki ta turno na meta 4 di e lista: Enseñansa di Calidad.
Un topico sumamente importante. Enseñansa di calidad ta e fundeshi riba cual ta basa mehoracion di bida di cualkier poblacion y desaroyo sostenibel en general. Tabatin bastante progreso haci den henter mundo pa mehora acceso na scol particularmente pa hende (y mucha) muhe. Eradicacion di analfabetismo a ser logra den hopi pais te na un grado bastante halto, pero no ta un realidad den tur pais ainda. Logicamente e regionnan sacudi pa conflicto arma y e paisnan mas pober ta e areanan di mayor preocupacion.
Nos por observa cu nos pais den e categoria aki ta score bastante bon, loke no ta straño cu e recursonan financiero cu nos tin na nos disposicion. Cu un GDP per capita di alrededor di $24.000 nos ta den e parti mas faboreci di mundo. Loke ta bira interesante anto ta si nos ta logra tur meta, si ta asina cu recurso no falta: “noblesse oblige.” Como criterio e mesun organismo di e 17 metanan ta maneha, cu cada pais mester uza por lo menos 6% di su GDP pa enseñansa.
A pesar di tur critica y keho, Aruba no ta logra yega na esaki y ta keda colga banda di 5% anualmente. Tuma na cuenta cu 1 % di GDP ta significa casi Afl. 50 miyon pa aña, cu nos mester ta invertiendo den enseñansa y nos no ta tende ningun comentario riba esaki, ni di gobierno ni di oposicion.
Naturalmente no ta trata solamente di simplemente gasta e placa, pero mas bien inverti na un manera sensato, den e cosnan cu ta haci mas diferencia. Kico anto mester mehora y tin prioridad pa inversion? Enseñansa di calidad ta exigi algo mas cu percura pa enseñansa basico. Den e mundo moderno den cual nos ta biba ta indispensabel cu bo sistema di enseñansa ta produci e empleadonan na nivel cu bo economia ta pidi. Si esaki no ta e caso, gradualmente sector priva ta cuminsa busca e unico alternativa cu tin y esey ta: importa e forsa laboral cu e habilidadnan necesario. Si ta desea di evita esaki, gran atencion mester bay na calidad di enseñansa basico y avansa.
Ban pasa pa e obstaculonan cu por detecta cu ta impedi pa nos yega na enseñansa di calidad, sin pretende di trata tur. Di e problemanan cu nos ta trece di hopi aña pasa caba, ta resalta e problema di idioma. Mas cu tur cos e falta di un escogencia definitivo pa e idioma di instruccion den enseñansa basico, ta haci cu realmente den cada local di cada scol por existi un mescla unico di Hulandes y Papiamento. Nos tin hopi aña caba den e situacion aki, unda cu cada docente riba su mes por dicidi cuanto di cada idioma e ta aplica den su les. Esaki no ta e unico problema cu ta conduci na un productividad deficiente di nos enseñansa basico cu tin su repercusion den enseñansa avansa tambe.
Dominio insuficiente di idioma no ta influencia prestacion solamente na nivel di enseñansa secundario preparatorio pa estudio superior, pero ta haci daño grandi na nivel di enseñansa avansa manera MAVO y EPI. Pa un gran parti esakinan ta e empleadonan di mañan cu pa un mayoria no ta bay studia den exterior y ta carga nan bida largo e consecuencia di enseñansa deficiente.
Awor cu e decision a cay cu ta habri e refineria di nobo como ‘upgrader’ ta surgi e pregunta – cu no a haya contesta ainda si nos tin enseñansa tecnico adecua pa provee e industria aki cu e personal cu e mester. Na nos opinion e contesta ta keto bay negativo, tumando na cuenta tambe cu pa hopi aña caba nos sistema educativo no ta orienta riba e industria aki.
Otro tema importante ta semper kico nos, como un teritorio chikito di apenas algo mas di 100.000 persona, ta tuma na decision encuanto ki tipo di enseñansa nos por financia y opera, y pa cual tin suficiente demanda den nos economia. Esey ta trece cu ne cu nos mester ta cuidadoso cu e tipo di enseñansa superior cu nos ta desaroya den cas y cuanto cupo lo permiti den cada categoria.
Tene na cuenta cu den haci e escogencianan al caso nunca ta posibel pa satisface opinion di tur. Como consecuencia nos ta mira cu un gran mayoria di diferente tipo di enseñansa no por tuma luga aki, pero ta continua manda nos studiantenan pa exterior. Esey lo keda un realidad cu nos mester simplemente reconoce.
Finalmente un tema cu merece un analisis y discusion mas amplio: nos no ta Yemen, ni Sudan. Nos ta parti di e mundo occidental desaroya cu ta move masha rapido mes. Esey ta haci cu ta urgente pa duna prioridad na digitalisa henter nos enseñansa mas pronto posibel. Y mester tin e espacio financiero pa logra esey!
