Den un aña den cual e pandemia di coronavirus a reina den mundo, infectando decenas di miyones y cobrando bida di casi 2 miyon persona, palabranan manera ‘sin precedente’, ‘extraordinario’ y ‘scur’ a bira cliché. Hunto cu candela, un temporada record pa horcan y un debate mundial tocante husticia racial, ta facil pa lubida algun di e noticianan tecnologico cu a resalta na 2020.
Memey di e temponan dificil, tecnologia hopi biaha tabata e unico linea di conexion pa hopi persona.
10. Tecnologia y e movemento Black Lives Matter
E morto di George Floyd tabata apenas e suceso mas recien den un serie di asesinato di hende color scur na man di polis, pero video di e incidente y e forma con el a plama riba rednan social a duna impulso na un debate nacional tocante husticia racial mientras protestanan a explota rond di e pais. E uso di celular y transmision en bibo pa documenta e protesta, e rol incomodo cu servicionan manera Facebook y Google a hunga den organisa e demostracionnan, y companianan tecnologico mes sosteniendo e movemento tur a laga cla cu tecnologia a laga su marca den e movemento.
9. Hack masivo di gobierno
Cantidad di parti di gobierno Mericano a wordo afecta pa un malware entrega via un update comprometi di proveedor di servicio di IT, SolarWinds. E malware a ataca Microsoft, cu a identifica mas di 40 cliente afecta. Ainda ta hayando mas informacion di e atake sin precedente aki.
8. Quibi ta fracasa
Maske tabata conta cu $1.75 biyon di fondo y sosten di poderoso di Hollywood, Jeffrey Katzenberg y CEO Meg Whitman, plataforma di video Quibi a cera a pesar di contrata talentonan incluyendo Chrissy Teigen, Lebron James, Dwayne Johnson, Reese Witherspoon, Chance the Rapper, Kevin Hart, y mas. Lansa un servicio exclusivamente pa aparato mobil memey di un pandemia tabata un eror. Cobra $5 pa luna mientras cu YouTube ta disponibel por nada tambe a hacie mas dificil.
7. Guera di streaming a escala
Mas cu nunca, e variedad di servicio di streaming a yena nos necesidad pa cultura pop, cu Tiger King di Netflix capturando tur atencion na comienso di e pandemia. Disney Plus a cementa su status ofreciendo Hamilton sin costo extra, maske a termina cobrando $30 pa acceso na Mulan. NBC Universal a lansa Peacock, mientras HBO Max di AT&T a crea sensacion ofreciendo Wonder Woman 1984 riba su plataforma gratis.
6. Trump y tecnologia
Presidente Donald Trump tin un relacion amor-odio cu tecnologia. Durante aña a destaca su bataya largo contra compania Chines, Huawei; su atake contra plataforma di video TikTok; y su guera contra Seccion 230 di e 1996 Communications Decency Act. E ultimo lo keda relevante durante 2021 tambe.
5. Facebook y Twitter finalmente a bira proactivo
Durante e pandemia y specialmente durante eleccion presidencial na Merca, plataformanan tecnologico tabata druk purbando di controla desinformacion, poniendo label y links na informacion mas confiabel.
Tambe nan tabata mas agresivo riba prohibi gruponan di conspiracion manera QAnon.
4. Ascenso di Zoom
Rapidamente a reemplasa reunion presencial cu videoconfrencia, y ningun otro servicio tabata mas popular cu Zoom. Pero e atencion tambe a trece luz riba su historia mixto cu seguridad, conduciendo na ‘pranks’ manera ‘Zoom-bombing’, poniendo Zoom cumpra un compania di seguridad. E hecho cu awo tin un condicion yama ‘fatiga di Zoom’ di sobreuso di e video chat ta prueba cu Zoom tabata e campeon.
3. Big Government vs. Big Tech
Pa fin di aña, ehecutivonan di tecnologia apareciendo dilanti Congreso a pasa cu suficiente frecuencia cu a perde su balor di novedad. Pero e hecho cu CEOnan di Alphabet, Facebook, Apple y Amazon tur a ser yama pa hustifica e poder inmenso cu nan tin ta mustra cu e era den cual companianan tecnologico por a bay sin check a termina.
2. Desinformacion tur caminda
Cantidad di teoria sin base a prolifera riba rednan social. Algun persona tabata asina convenci cu 5G a causa e coronavirus cu nan a kima ekipo di celular y ataca tecniconan. Of cu Bull Gates di algun forma a causa e coronavirus y kier implanta chips den hende. QAnon, cu ta bisa cu Hollywood y e elite democrata ta pedofiel y satanico, di algun forma a crece na e punto cu dos oficial electo a identifica como creyente den QAnon.
1. Vacuna
E ciencia tras di desaroya vacuna pa Covid-19 asina lihe ta mas cu hustifica su spot den No. 1. E vacuna di Pfizer y Moderna ta usa un molecule conoci como RNA mensahero, of mRNA, cu ta manera un set di instruccion cu celnan humano ta usa pa construi proteina. Ambos vacuna ta inclui e instruccion aki, gañando e celnan pa produci fragmentonan no dañino di e virus. E curpa ta reconoce e fragmento, generando anticurpa contra dje y proveyendo inmunidad a largo plaso.
Esey ta e sorto di tecnologia cu nos tur por sostene.
