Ayera Departamento di Salubridad Publico (DVG) a duna di conoce cu na Aruba a registra 5 caso di e variante nobo identifica pa prome biaha na Reino Uni. Relaciona cu esaki ayera mainta medionan di comunicacion a informa comunidad cu e cinco persona aki a recupera, pero esey no ta nifica cu e virus a desaparece.

Asina a duna di conoce Jurette Croes ken ta vocero di Departamento di Salubridad Publico pa Bon Dia Aruba un rato pasa na unda por a compronde for di rednan social cu e cinco persona aki a recupera caba pero esey no ta nifica cu e virus a desaparece completamente.

El a splica cu e prome cinco hendenan aki a recupera, pero loke nan no sa ta si nan a pega e virus aki pa otro hendenan, di e cinco persona, dos di nan no tin registro cu nan a haci algun biahe pa exterior ni tampoco tin historia si nan tabatin contacto cu un hende positivo cu tin contacto cu e otro tres persona aki.

“Cu esaki mi por bisa cu nos ta conclui cu e variante nobo ta na Aruba y nos no sa precies te na e momentonan aki con hopi e lo a plama”, Croes a señala.

Ademas el a menciona cu nan ta sigui manda e diferente test tur siman na Hulanda, pa por controla nan riba e diferente variante. Pero manera a bisa caba, dos persona a wordo contagia localmente, loke ta nifica cu e variante nobo aki ta na Aruba.

“No ta asina cu pasobra e 5 aki ya no ta activo mas y nan a recupera, e virus a desaparece. Probablemente tin mas persona cu ta canando rond cu e variante aki”, Croes a afirma.

Laboratorio di Hospital ta esun encarga di manda e testnan aki na Hulanda pa asina por check riba e diferente variante cu a origina.

Riba website di Rijksinstituut voor Volksgezondheid en Milieu (RIVM) di Hulanda recientemente a publica cu e variante nobo di e virus, cu a cuminsa circula na Reino Uni for di luna di september, ta parce cu ta mas contagioso cu otro variantenan, segun expertonan Britanico. Te ainda nan ta investiga esaki. Esey ta rekeri mas investigacion di laboratorio pa analisa e propiedadnan di e virus.

Tambe a detecta na Sur Africa un otro variante, cu te ainda no tin claridad di con esaki por ta infeccioso, pa motibo cu ta un variante diferente cu esun cu ta circula na Reino Uni y te ainda no a wordo registra na Hulanda.

Na Hulanda awor ta tumando luga diferente investigacion riba e virus y si e ta cambia. E determinacion di e variante Britanico di e virus na Hulanda a surgi di un programa di investigacion den cual RIVM, Erasmus MC y 21 laboratorio na Hulanda ta traha hunto, nan ta yam’e “vigilancia di germen”.

E laboratorionan ta manda frecuentemente un muestra pa RIVM of Erasmus MC, na unda despues nan ta examina esaki. Di e manera aki, por haya sa na ki luga di e pais e variante ta origina. E investigacion aki ta yama analisis di secuencia. Actualmente nan ta analisa 350 muestra cada siman na Hulanda.

Cu e paso di tempo, diferente cepa di coronavirus SARS-CoV-2 a aparece pa asina complica, ainda mas, e situacion epidemiologico na henter planeta y e diferente crisis cu ta deriva di dje.

E variante di Reino Uni (B.1.1.7) ya caba ta den mas di 50 pais, Aruba entre nan, y tin mas di 23 mutacion pa loke ta trata e virus haya na China.

E variante Sur Africano (501Y.V2.) cu a wordo identifica na fin di luna di december tambe ta 50% mas contagioso cu e coronavirus comun. Pero ta parce cu su efectonan den organismo ta hopi similar. Esaki a wordo registra na 13 pais.

E di tres cu a origina di ultimo a nace na Amazonas (E484K) y su circulacion a wordo haya na comienso di januari, ora a wordo diagnostica cerca biaheronan Hapones procedente di e region Sur Africano. Den e caso aki, e parti mas preocupante ta cu cientificonan tin e temor cu lo por reinfecta pashentnan cu a supera Covid-19 caba, y a registra e variante aki na 8 pais.

E tres variante aki ta parce cu ta mas efectivo pa infecta celulanan y por plama mas lihe, den futuro tambe por surgi mas variantenan diferente.

Den un publicacion di dialuna ultimo cu canal di television CNN a publica riba su website, a informa cu a surgi un variante nobo na Merca, cu e cual ta bira esun di number 4 denomina P.1, funcionarionan na Minnesota a expresa dialuna ultimo.

P.1 ta un di e cuatro variante di Covid-19 cu ta wordo vigila di cerca na Centronan di Control y Prevencion di Enfermedadnan (CDC) te dialuna ultimo. E cepa aki a wordo registra solamente na Brasil y entre e grupo di biaheronan di e pais aki pa Hapon.

Di loke ta trata e vacuna, si esakinan ta diseña pa e variantenan, cientificonan ta confia cu te ainda si por funciona, aunke no hopi bon.

Vacuna ta diseña pa entrena e curpa pa ataca diferente parti di e virus, den pio di e casonan e vacunanan lo por wordo re-disena y modifica si lo ta necesario den cuestion di simannan of lunanan, segun expertonan a bisa.

Segun un estudio preliminar, vacuna Pfizer y BioNTech a mustra efectivo contra 16 mutacion di e diferente coronavirus. Esaki lo por a indica cu su eficacia no ta keda comprometi cu e variantenan como esun di origen Britanico y Sur Africano.

Ta p’esey ta importante pa Aruba por cuminsa cu e proceso di vacunacion, cu te ainda comunidad no sa precies ki dia esey lo inicia, y cu na otro paisnan rond di mundo e proceso a cuminsa caba.