A tuma nota cu den e dianan cu a pasa hopi persona cu no tin sintoma ta core bay test sea pasobra nan ta den cuarentena of tawata tin un contacto positivo. DVG na mas cu un ocasion a splica ampliamente cu test sin sintoma no ta wordo conseha pa haci. Si e persona no tin suficiente virus den su sistema e test lo sali negativo mientras cu porta algun dia despues sintomanan ta cuminsa y e persona mester bolbe test.
E PCR test cu ta wordo haci na laboratorio di hospital no ta gratis, e ta wordo cubri pa AZV y ta na interes di nos fondo di seguro AZV pa haci bon uzo di cada COVID test.
Un bes mas e suplica ta bay na comunidad, si bo persona ta den cuarentena of tawata tin contacto cu un persona positivo esaki no ta motibo pa solicita pa test. Unicamente na momento cu bo tin sintoma of si bo self test a sali positivo bo ta wordo pidi pa haci un PCR na Laboratorio di hospital.
E sintomanan cu un persona contagia cu COVID por experencia ta;
▪︎Keintura,
▪︎Dolor di cabes,
▪︎Dolor di weso,
▪︎Cansancio,
▪︎Dolor di garganta,
▪︎Tos,
▪︎Perdida di holor y smaak,
▪︎Nanishi ta core.
Si bo ta presenta mas cu un di e sintomanan aki yama bo dokter di cas pa por haci un test of solicita e COVID test via https://covid19test.healthapp.aw/
Entrante 4 di januari 40+ tambe por ricibi ‘Booster Shot’ contra COVID-19
Oranjestad- 3 di januari 2022, DVG ta informa cu e entrante diamars 4 di Januari 2022 lo cuminsa duna e ‘Booster Shot’ na tur persona 40 aña of mas. Manera por observa rond mundo e booster shot ta brinda proteccion extra contra Delta y e variante nobo Omicron, haciendo cu e efectonan ta menos severo pa e persona cu keda contagia cu e virus.
Orario pa por acudi pa ricibi e Booster shot ta di 8 or di mainta pa 3 or di atardi non stop na Centro Libertador Betico Croes for di dialuna pa diabierna. Den weekend ta cera. Pa ricibi e vacuna no mester di traha cita, simplemente cana kibra – ‘walk in’ pa ricibi bo booster shot.
