Segun relato di Directie Volksgezondheid, ‘Temporada di yobida a cuminsa y di experiencia ta conoci cu esaki ta nifica aumento di sangura. Cu aumento di sangura nos ta haya aumento den caso di Zika, Dengue y Chikungunya.’
Zika, Dengue y Chikungunya tur ta malesanan cu ta wordo transmiti pa e sangura Aedes Aegypti. Algun luna atras, Bon Dia Aruba a trece dilanti informacion cu tabata tin un number alarmante di persona cu Zika. Despues cu departamentonan a nenga esaki na varios ocasion, a bin resulta cu e noticia tabata veridico.
Segun DVG, ‘Den caso di dengue esaki por ta grave te hasta fatal pa cierto hende cu a haya dengue den pasado caba. Ta hopi importante, como comunidad henter, pa nos uni contra transmision di e malesanan aki. Nos por haci esey door di kita of deshaci di tur awa cu ta para y cu por bira un criadero di sangura. Cana rond di cas y bolter tur loke ta wanta awa, controla den cas tambe pa obheto cu tin awa para.’
DVG ta pidi pa keda na alerta pa luganan unda posiblemente lo por tin of por bira un criadero, ‘ si bo ta tuma nota cu na un luga publico tin hopi sangura bo por tuma accion y yama Gele Koorts- en Muskieten Bestrijding (GKMB) pa raporta esaki. Durante e proximo siman, Departamento di Salud Publico lo ta bishitando diferente medio di comunicacion pa amplia riba e tema.’
E campaña cu ta bay cuminsa lo bay enfoca riba e hende muhe y hende homber cu tin plan pa forma un famia y muy en particular e hende muhe cu ta na estado caba. Pa e grupo di personanan aki, DVG ta informa cu ‘Zika por tin consecuencia grave pa desaroyo di e baby cu ta den bariga di su mama. Zika por wordo transmiti door di pica di un sangura infecta, pero tambe door di contacto sexual di e homber cu tin Zika pa un hende muhe prome of durante embaraso.’
E relato ta conclui cu: ‘ta di gran importancia pa comunidad henter yuda deshaci di tur criadero pasobra na final di dia e por afecta cada un di nos. Nos tur tin un familiar of conoci cu ta na estado y cu mester pa nos yuda proteh’e y su baby.’
