DVG ta pidi comunidad pa ta consciente y yuda alivia situacion na hospital

Mediante un comunicado di prensa, Hospital Dr. Horacio Oduber a informa cu pa motibo di un aumento den e cantidad di pashent interna den e dianan cu a pasa, nan ta pospone nan operacionnan temporalmente.

E aumento den cantidad di pashent interna ta pa motibo di accident, uso di alcohol, maltrato, problemanan respiratorio y otronan. Otro factor cu a tene cuenta cune tambe y cu ta afecta e capacidad di camber na hospital ta e construccion y renobacion di hospital cual ta limita nan capacidad.

Teniendo na cuenta e factornan aki hospital a tuma e decision di pone un stop temporario na tur pashent cu ta planea pa haci operacion (operacion electivo).

Pa por alivia e citacion, aki Departamento di Salud Publico (DVG) ta haci un suplica na comunidad pa ta mas cauteloso y cuida nan salud den e dianan cu ta sigui pa evita cu mester keda interna den hospital pa un situacion cu por a wordo preveni.

Aruba ta den pleno temporada di carnaval y esaki ta un temporada hopi activo cu na mesun momento por trece peliger cune. DVG ta duna algun tip na comunidad cu por yuda evita di keda interna den hospital.

Limita uso di alcohol ya cu uso di alcohol ta baha e defensa cu e consecuencia cu por laga un persona bira malo mas lihe. No bebe alcohol y maneha vehiculo di motor, esaki por conduci na accident pa cual motibo tin pa wordo interna den hospital.

Evita contacto cu hende cu sintoma di griep y si bo persona ta malo cu sintoma di griep, no bay den publico. Keda cas y recupera. Un griep mal cuida por desaroya den complicacion. Aplica tur medida di hygiena manera laba man frecuentemente, y es cu ta den grupo di risico manera mucha bou cinco aña, hende muhe na estado, adulto mayor di 65 aña y esnan cu un of otro malesa cronico of un sistema inmunologico comprometi pa motibo di un malesa pa usa tapa boca si ta necesario.

Come saludabel, haci actividad fisico y hidrata cu likido cu no tin hopi sucu y bebe bo remedinan manera ta ser prescribi. Ta urgi tambe esnan den grupo di risico pa vacuna contra Influenza y COVID tur aña.

Por ultimo ta suplica pa esnan cu tin sintoma di griep tuma contacto cu nan dokter di cas trempan pa esaki por monitor y duna guia durante e proceso di recuperacion. No warda te ora cu e sintomanan ta hopi malo pa bay pidi asistencia medico na SEH. Cu asistencia di dokter di cas tempran por evita cu mester wordo interna den hospital.