Segun un comunicado di prensa di Departamento di Salud Publico, nan ta indica cu mirando cu e variante Omicron a haci su entrada na Aruba y estudionan ta demostra cu e variante aki ta mas contagioso, ta di gran importancia pa Aruba trece cambio den maneho pa evita un brote di casonan nobo cu tur su consecuencianan pa salud publico, economia y recuperacion.
Cuminsando for di 20 di december 2021 e maneho di cuarentena a conoce cambio y e cambio ta encera cu tur persona cu ta biba of tabatin un contacto estrecho cu un persona positivo, esaki ta wordo poni den cuarentena pa 10 dia, vacuna of no.
Manera ya ta comproba, esunnan cu ta vacuna tambe por keda contagia y por contagia un otro y teniendo na consideracion e grado halto di contagio den e ultimo siman, DVG responsablemente ta opta pa bay back na e protocol bieu te ora cu e casonan baha atrobe y yega na averahe semanal di minimo 20 caso pa dia.
DVG ta haci un suplica na tur persona cu ricibi un resultado positivo pa isola nan mes en espera di un yamada di DVG, Esunnan cu test den fin di siman lo por wordo yama ora siman habri, pa cual motibo ta urgi tur persona pa sea mas responsabel y isola nan mes si ta test positivo pa COVID. Tambe nan kier recorda tur cu test positivo, pa lesa e protocolnan di isolacion y cuarentena riba www.arubacovid19.org/protocolnan.
