Ya caba ta papia di un mutacion of cambio di e virus di Covid-19 na Europa y muy particularmente na Inglatera. E ta un variante di SARS-CoV-2 (Covid-19).
Un situacion cu ta preocupa e autoridadnan di salubridad publico di cada pais y Organisacion Mundial di Salud (WHO). E malesa produci pa e mutacion no tin mucho informacion, pero aparentemente e ta mas agresivo y contagioso cu Covid-19.
Epidemiologo Dr. Garreth Tromp a bisa cu ta bon motibo pa comunidad mundial ta preocupa. Dr. Tromp no a bay mucho den detaye riba e mutacion di e virus aki, pero si el a bisa cu esaki ta un virus cu ta mustra cu no ta mas peligroso necesariamente ainda. Aunke te ainda expertonan no ta mucho seguro di esaki. Pero si e ta mustra cu ta un virus cu ta wordo transmiti mas facil.
Dr. Tromp ta haya importante pa nos comunidad ta consciente di kico e virus aki kiermen. Pero tambe pa wak con nan ta mantene nan mes na e reglanan cu DVG y Crisis Plan ta bin papiando durante e temporada aki di Covid-19, entre nan distancia social, higiena y bay test na tempo.
Di su banda, Dr. Daisy Ooms, kende ta dokter specialisa riba control di malesanan contagioso, a declara na Bon Dia Aruba cu e test di PCR uza pa detecta Covid-19, tambe e por yuda pa detecta e sorto di virus nobo aki. Dr. Ooms a laga sa cu na Aruba ta wordo detecta tres gen di e cual un so di nan tabatin mutacion. Incluso cu e test aki nan por detecta e mutacion aki.
Segun informacion divulga pa e cadena prestigioso di noticia BBC, e variante of cambio nobo di e Covid-19 ta conoci como B117 (of tambe como VUI-202012/01). Segun nan a informa e cepa aki a causa un aumento sin precedente riba e cantidad di caso na Inglatera. E virus aki a conoce un mutacion predominante den apenas tres luna, desde cu a ser descubri na luna di september ultimo.
Na final di december por ehempel ta wordo calcula cu un 60% di e casonan nobo na London y regionnan bisiña tin di haci cu e mutacion di e virus aki. Te ainda ta falta mas informacion pa descubri for di e mutacion di SARS-CoV-2 (Covid-19).
