Departamento di Salubridad Publico (DVG) a dicidi di alerta nos comunidad, mirando e cantidad di caso di Dengue, Zika y Chikungunya cu ta wordo reporta den nos region. Pero tambe e temporada di yobida cu a drenta, cu ta haci cu cantidad di malesa transmiti pa sangura por aumenta.

Durante e conferencia di prensa cu a conta cu presencia di Eugene Maduro di e seccion di Epidemiologia, Director di departamento di Combatimento Contra Sangura (GKMB), Luis Chong y Dr. Wilmer Salazar di DVG, nan a dicidi di pone nos comunidad na haltura di e ultimo desaroyo rond di e tres malesa transmiti pa e sangura Aedes Aegypti of sangura di pata blanco cu nos tin’e na Aruba.

Casonan.
Na 2019 tin 13 caso confirma di Dengue na Aruba, aunke e casonan ta mustra relativamente tiki, pero esaki no kier men cu no mester atende e situacion di criadero di sangura.

Nan no ta descarta cu si nos comunidad no ta consciente, e 13 casonan aki por bira 130 of mas. E mensahe principal ta: No laga awa acumula den bo cura di cas. Y si bo tin awa acumula pa muha mata, no lag’e mas cu 5 dia. Ya cu tin indicacion di PAHO cu nan ta premira cu e casonan aki lo por aumenta.

E districto di Oranjestad tin e mayoria di caso confirma di Dengue. E aña aki no a wordo registra oficialmente niun caso di Zika confirma, pero si un caso confirma di Chikungunya.

P’esey nan a haci un yamada na comunidad pa evita e acumulacion di awa cu ta produci criadero di sangura. Pero tambe adopta e medidanan preventivo pa evita picadura di sangura, principalmente pa e biaheronan local cu den e temporada di vakantie di otro siman tin pensa di bishita e paisnan unda e casonan di Dengue, Zika y Chikungunya ta aumentando peligrosamente.

Vigilancia.
Segun Eugene Maduro, un luna pasa nan a ricibi un update epidemiologico di PAHO, ya cu e cifranan di e malesanan aki transmiti pa e sangura Aedes Aegypti a aumenta den nos region, y mester reenforsa nos sistema di vigilancia interno. Atencion special ta wordo poni riba e tipo di sintomanan cu e pashent ta presenta cerca su dokter di cas. Un yamada a wordo haci na hende muhe na estado, ya cu Zika tin un efecto adverso riba e feto, asina Maduro a bisa.

Na 2019 no a wordo raporta niun caso di hende muhe na estado cu un infeccion activo di Zika. Pero si nan tin nuebe registra cu a bin den contacto cu e virus di Zika den pasado. Maduro a informa cu na Aruba tin un programa caminda hende muhe na estado ta wordo screening riba Zika

Brote den nos region.
Tin un brote di Dengue na Centro America, particularmente na Nicaragua, Belize y Honduras, unda te hasta caso di morto a wordo raporta.

Tambe na Sur America y e region Andino, unda Colombia tin mas caso registra, caminda ta existi un brote cu a produci morto, tambe na Brasil. El a bisa cu e intencion ta pa preveni un brote na Aruba, considerando por ehempel cu Colombia ta un destinacion di vakantie hopi popular. Den nos region Caribe, Republica Dominicana tin un crecemento di 500% compara cu 2018 y tambe na St. Maarten, Jamaica y otro islanan.

Tur e alarma aki ta pa henter comunidad ta mas consciente, ya cu ta cientificamente demostra cu despues cu awa yobe, e notificacion di caso di malesa transmiti pa sangura ta aumenta.

Chong di GKMB a bisa cu nan ta hopi ocupa atendiendo cu asunto di criadero, mirando cu nos tin e sangura Aedes Aegypti y nan kier preveni un brote di Dengue, Zika y Chikungunya, considerando loke ta pasando den paisnan den nos region y bisindario. El a bisa masha cla cu nan tin preocupacion na Aruba, pasobra si nos comunidad no ta stroba e criadero di sangura rond di cas, negoshi y luga cu nos ta frecuenta, nos tambe lo por sufri di un brote asina.