Mediante un comunicado, Seccion di Epidemiologia y Investigacion di Departamento di Salud Publico ta informa cu nan ta mirando un aumento leve den casonan sospechoso di Dengue na Aruba, pa e motibo aki nan ta pidi na comunidad pa tuma medidanan necesario pa stop e transmision di dengue.

Nan ta señala cu esaki ta basa riba datonan ricibi for di un sistema di vigilancia nobo cu ta monitor sintomanan cu dokternan di cas ta reporta y resultadonan di laboratorio tambe ta confirmando casonan positivo.

Den region tambe esaki ta tumando luga caminda diferente pais, manera Brazil, Uruguay, Argentina, entre otronan, ta bin registrando aumento di casonan sospechoso di Dengue.

A pesar cu e temporada ta seco sin mucho yobida, seccion di GKMB tambe ta informa cu nan ta hayando criaderonan di sangura rond di casnan, particularmente cerca ciudadanonan cu ta colecta awa pa planta of muha mata, loke nan ta haya mas frecuente pa cu criadero di sangura ta hemchi y bari cu awa.

Specificamente un luna pasa, 22 di februari, Departamento di Salud Publico di Aruba DVG tambe a manda un comunicado indicando cu nan a mester coregi informacion di consulado Mericano ubica na Curaçao, e cual a emiti un yamada di “alerta” pa brote di casonan di dengue den Caribe referiendo na diferente islanan manera Curaçao, Aruba, St Maarten (CAS) y tambe islanan Bonaire, St Eustatius, Saba (BES).

“Como Departamento di Salud Publico di Aruba encarga cu vigilancia di malesanan infeccioso y malesanan transmiti pa sangura nos kier informa comunidad di Aruba cu e informacion aki mencionando Aruba como isla experenciando ‘outbreak’ di dengue ta incorecto.” DVG a sigura na e momento ey,” un luna despues e situacion ta contradeci e comunicado aki.

Sinembargo, comunidad mester keda cauteloso y pa por stop e transmision di e virus di dengue mester reduci of stop e sangura di sigui broei, por haciele door di:

  • Tira afo of warda tur obheto cu por retene awa paden y rond di cas, scol, trabou, etc. Por ehempel scoter bou mata, taira, coy hunga pafo, vaas cu mata of flor y mas.
  • Tapa tur awa colecta den bari of hemchi.
  • Controla tur obheto paden y pafo di cas cu por tin awa para (manera vas cu flor, baki awa di mascota, etc.) riba larva nan di sangura.

E sintomanan ta lo siguiente:

  • Keintura.
  • Dolor di cabes.
  • Biramento di stoma of sacamento.
  • Diarea.
  • Dolor di weso, joints y musculo (dolor di curpa).
  • Dolor di wowo.
  • Rash.

Nan ta recomenda cu si e persona tin un of mas sintoma ariba menciona, mester acudi na su dokter di cas pa por haya un evaluacion. Ta importante pa informa dokter di cas ki dia e persona a cuminsa sinti malo pa asina e por haci testnan adecua di laboratorio. Si dokter ta diagnostica e persona cu sospecho di Dengue, mester tuma nota di lo siguiente:

  • Evita picadura door di sangura.
  • Paracetamol ta e unico remedi cu por bebe, otro pildernan por causa sangramento (manera ibuprofen, diclofenac, etc).
  • Bebe hopi likido pa mantene e curpa hidrata.
  • Sosega lo mas posibel.