DVG no ta confia riba tur test cu a wordo upload; No por nenga entrada na residentenan

Desde cu pais Aruba a dicidi habri su frontera gradualmente, casonan di Covid positivo a wordo importa y actualmente nos tin 10 caso activo di e virus.

Apesar cu henter un protocol a wordo introduci, toch e hecho cu e casonan importa di Covid ta sigui drenta, y solamente nan ta wordo detecta na Aruba mes -y no prome cu e turista ta aborda e avion- ta mustra cu tin un bypass den e sistema aki. Un pregunta cu ta surgi ta: Dicon no ta obliga pa tur biahero getest prome cu nan bin Aruba?

Sharline Koolman di DVG a bisa cu nan a yega di pone pa cierto rekisito prome cu un biahero bin Aruba, entre otro pa nan upload nan resultado di un test, prome cu nan ta biaha. A pesar cu e rekisito aki ta valido tin algun problema cune: Ora cu e personal ta haya e test na DVG, tin biaha e test no ta valido. Un motibo ta cu e por ta mas cu 72 ora.

Otro caso ta cu e por ta otro tipo di test cu DVG no ta acepta. Pero tambe caso cu por ta nos propio autoridad di salubridad ta sospecha cu e test ta falsifica. Nan ta algun di e motibonan cu DVG su personal no ta confia riba e test cu ta wordo manda y mester getest e persona, ora e ta yega Aruba.

Residente y test

Igualmente el a laga sa cu si un persona ta bin for di un pais di riesgo halto di Covid, si e persona ta residente no mester upload necesariamente nan test. Pero si nan mester test na Aruba. Pero den caso di un turista si tin e obligacion pa upload e test

Otro caso tin di haci cu a pesar cu tin restriccion pa realisa e tipo di vuelo for di Republica Dominicana y Haiti, un pasahero Dominicano a yega tog Aruba, haciendo uzo di Miami como trampolin, y el a resulta positivo na Covid. Dicon ta permiti e tipo di cos aki?

Sra. Koolman a splica riba e caso di persona residente cu ta bin por ehempel di Republica Dominicana cu actualmente tin restriccion pa biahero bin directamente for di e pais aki. Pero si e persona aki ta hacie via otro pais, den e caso specifico aki via di Merca, dificilmente nos autoridad local por nenga su entrada na nos pais.

Sinembargo e mester pasa dor di nos sistema di control. Ora cu e ta yega Aruba e mester test. Igualmente tur hende residente tambe, e no mester upload resultado di e test. Pero unabes cu e ta yega Aruba, e tin obligacion di test akinan mes.

Sra. Koolman a haci un yamado na e personanan cu tin pensa di bay vakantie den e circunstancia actual di e pandemia, pa corda bon cu ora nan ta yega bek, nan tin cu test y nan tin cu paga pa e test aki.