E accidentenan di trafico causa pa abuso di consumo di alcohol ta grandi, specialmente durante temporada di carnaval.

Jurette Croes di e seccion di informacion y comunicacion di departamento di Salud Publico (DVG) a bin cu datonan relaciona cu siguridad den trafico, considerando cu nos ta den temporada di carnaval, unda un di e factornan di risico den trafico ta e consumo di alcohol.

Cifranan cu DVG tin pa ilustra riba e problematica aki ta indica cu pa aña alrededor di 16 persona ta fayece victima di trafico insigur. Di e 16 personanan aki un 75% di nan ta hende homber, mientras cu un 25% ta hende muhe. Esaki kiermen cu 12 hende homber ta fayece anualmente y 4 hende muhe ta victima di accidente di trafico.

E cifranan cu sra. Croes a bin cu ne no ta directamente relaciona cu alcohol, ya cu tin otro factornan di riesgo manera coremento iresponsabel na velocidad halto. Pero e problematica ta grandi y hopi biaha e consecuencia por ta lamentabel. Aunke tin biaha e victima no ta fayece, pero si e ta keda cu limitacion cu ta un peso riba e famia y tambe financieramente, y tambe riba nos sistema.

Un punto cu el a trece dilanti ta cu e edad mas afecta ta entre 15 pa 24 aña. Esaki ta bisa bo cu nos hobennan ta na peliger den trafico. “Hopi alcohol ta wordo consumi den e temporada aki y tur persona cu ta den un actividad di carnaval tin cu yega na nan cas.”

Pa evita of disminui e indice di accidente, el a bisa cu tin alternativanan y opcion pa bo evita di core bou influencia di alcohol. Un opcion tin di haber cu asigna un persona cu no a consumi alcohol pa hiba bo safe na bo cas.

DVG hunto cu fundacion FADA y fundacion Zinnia kier curasha nos comunidad den e temporada di carnaval aki pa papia cu bo conductor asigna den cuadro di e campaña di Amigo Didi.

El a bisa cu departamento di Salubridad Publico ta sostene e campaña aki, ya cu nan ta kere cu esaki ta un alternativa pa tur hende cu ta bay actividad di carnaval y nan ta bay consumi alcohol. Bo por haci palabracion cu famia y amigonan pa asigna cual di nan lo ta responsabel pa tur hende yega na cas safe. “Tur hende tin un familiar na cas cu ta warda riba dje pa yega na cas safe.