Den un comunicado di Departamento di Salud Publico (DVG), a duna di conoce cu for di dia 13 di maart cu e prome caso di COVID-19 a keda registra na nos isla, como DVG un di nan tareanan tabata pa educa comunidad lo miho posibel riba con ta preveni contagio cu e virus y evita cu e ta si sigui plama.

Asina mes nan a señala cu nan a haci esaki door di mantene un comunicacion dinamico transparente y riba base diario cu comunidad.

Danki na esfuerso di un y tur, por bisa cu a logra mantene e transmision di e virus te na e momentonan aki na un nivel manehabel pa pais Aruba, pero e peliger no a pasa ainda, e lucha ta sigui.

DVG tambe a trece a dilanti cu awor cu poco poco ta bay cuminsa laga comunidad bolbe bek na trabou, ta hopi importante pa cada un di personanan sigui aplica tur loke a siña pa e “Normal Nobo”.

Importante ta pa resalta cu e virus di COVID-19 no a disparce, e ta parce cu el a bay pa un rato y despues e por t’ey atrobe. Pero pa evita esaki, ciudadanonan mester adapta nan forma di biba pa ta consciente y proteha nos tur pa no hay’e y si a haya caba pa no sigui plam’e. P’esey mes ta necesario pa cada persona aplica tur medida basico di prevencion cu a henter comunidad a siña durante di e ultimo simannan:

• Sea consciente di bo accion y su peliger pa cu bo salud y di bo famia.

• Si bo ta malo no bay den publico, pero consulta cu bo dokter di cas tocante bo sintomanan.

• Evita bay unda tin aglomeracion di hopi hende.

• Mantene distancia fisico di 2 meter for di otro persona.

• Evita mishi cu wowo, nanishi y boca.

• Evita mishi cu hopi articulo of superficie cu bo man.

• Ora di saluda, no sushi, brasa of duna man.

• Laba man frecuentemente cu awa y habon of usa hand sanitizer cu 60% di alcohol.

Esakinan ta algun conseho basico cu Departamento di Salud Publico ta recomenda pa reduci e transmision di e virus. Si cada persona cu ta biba riba e dushi pida baranca aki cu ta yama Aruba, sigui e consehonan menciona, lo por sigui maneha e cantidad di casonan na Aruba riba un minimo.

E meta principal ta pa detecta un caso trempan, test, diagnostica, isola y identifica tur esunnan cu tabatin contacto cu e caso y pa logra esaki Aruba mester di tur.