DVG lo test mas proactivamente pa evita cu persona ‘sin nan sa’ transmiti Covid-19

Minister Dangui Oduber (MEP) a anuncia den conferencia di prensa awe nochi cu Departamento di Salud Publico (DVG) a amplia e disponibilidad di testnan pa Covid-19 por medio di cambia e definicion di caso. Oduber a indica cu e meta di traha mas proactivamente ta pa evita ‘cu na momento cu tin un persona cu ta positivo sin cu e mes sa, cana rond siendo cu e ta positivo, cual ta haci cu e ta contagia hopi mas hende’.

E decision ta sigui un yamada di varios persona di comunidad cu ta indica cu nan no ta sinti tur 3 sintoma di Covid-19, cual ta nifica cu nan normalmente no lo por a bin na remarke pa test. Di e manera aki ta haci e condicion pa test menos estricto. Esaki kiermen cu personanan cu no mustra tur sintoma di e malesa— cual por ta un cantidad substancial mirando cu no tur hende ta haya e mesun reaccion— aworaki por bay yama e number di DVG 2800101 pa asina por duna indica cu nan ta sintiendo algun di e sintoma di Covid-19 pa asina por determina si nan ta carga e virus.

Minister di Salud a bisa cu actualmente ta haciendo 40 test pa dia. “Te aworaki nos a nota cu tur caso cu a test positivo ta mustra sintoma leve y p’esey nos a bay over na un approach hopi mas agresivo, proactivo pasobra nos kier test mas hende cu ta posibel. Pasobra tin hende cu por ta canando cu sintoma of cu por ta positivo sin nan sa. Nos kier evita cu e tipo di hendenan aki lo sigui contagia mas hende den comunidad”, e mandatario a expresa.

Aruba ta activa ‘search and destroy’ contra Covid-19 pa proteha hospital y caso severo

Sharline Koolman di Servicio di Malesanan Contagioso (Dienst Besmettelijke Ziektes, DBZ) a indica cu e decision aki ta activa Aruba su plan pa ‘search and destroy’ e virus cu ta causa e malesa Covid-19. “Esaki kiermen cu nos ta busca mas tanto caso cu ta posibel pa asina nos atende esakinan mas pronto cu ta posibel. Nos no ta bay sinta warda te ora un caso presenta y atend’e cune. Esey por causa cu hopi caso ta aparece cu no ta leve mas”, Koolman a splica. No solamente pa proteha persona cu lo por contrae e virus y cu tin condicion di salud existente, pero tambe pa proteha hospital.