Pa fin di januari of cuminsamento di februari, e vacuna contra Covid lo haci su yegada na nos isla, si prome nos ta cumpli cu tur exigencia di transporte, conservacion y aplicacion di e vacuna na Aruba.

Inspeccion

Ayera Sra. Sharline Koolman di DVG a informa cu nan mester haya e freezernan adecua pa instala nan den e luga bon protegi caminda e vacunanan lo wordo poni. Pa tal motibo Aruba lo haya bishita di personal di Hulanda entre 25 pa 26 di januari pa wak si e localidad ta cumpli cu tur exigencia.

Tambe nan lo duna training con bo ta mantene un vacuna pa e temperatura exigi no cambia. Ya cu e vacuna aki ta uno hopi sensibel na cambio di temperatura. E vacuna aki ta exigi pa no tin niun contratiempo den su transportacion, te ora cu e ta yega na nos freezernan na Aruba. Di e forma aki nan por sigura cu e vacuna ta bon y no tin niun fayo.

Un fayo ta nifica cu nan ta perde e vacuna, y den tempo cu nos ta pasando aden, e “vacuna aki no solamente ta bal placa, pero nan por ta salud di hende,” Koolman a declara. A base di esey, nan ta traha hopi di cerca cu Instituto Nacional di Salud y Medio Ambiente di Hulanda (RIVM) hunto cu e cinco isla di nos region.

E inspectornan di salud aki lo bay haci nan respectivo control pa wak si Aruba ta cumpli cu tur rekisito exigi. Si tur cos ta corecto pa fin di januari of comienso di februari e vacunanan lo wordo transporta pa nos isla y despues di esey nan lo cuminsa di biaha e dunamento di esaki.

Koolman a indica cu nan ta biniendo cla cu cada punto di e plan. Unabes cu esaki ta cla e mesun bureau di minister presidente ta bay anuncia con e proceso aki lo bay sosode. Sinembargo si e casonan di Covid ta sigui crece na Aruba, manera el a cuminsa crece, e por tin su efecto. Ya cu despues di Pasco nos ta bay wak aki 14 dia of un luna e efectonan riba e cantidad di caso nobo. E ta net e momento cu nan ta preparando pa cuminsa vacuna. Mientras cu ta e mesun dokternan y enfermeronan tin cu haci tur dos, esta aplica e vacuna y atende cu e casonan nobo. Esaki lo pone hopi presion riba e grupo aki.

Vacuna y efecto

Encuanto si e vacuna aki ta aplicabel pa tur hende, mirando cu e por produci cierto efecto specialmente di alergia, Koolman a laga sa cu tur vacuna ta produci algun reaccion.

Pero dor cu e vacuna cu nos poblacion ta bin hayando añanan caba, casi cu bo no ta haya efecto mas riba nan. Pero e vacuna aki di Pfizer-BioNTech dor cu e ta nobo, berdaderamente bo por haya cu tin hende cu por ta alergico p’e.

Pa e motibo ey, nan mester tin tur cos bon hinca den otro cu e remedinan rekeri y cu e personal necesario pa e momento di e vacunacion si algo pasa, nan por reacciona y atende e persona di biaha. Cu e vacuna aki, DVG lo ta hopi mas cauteloso pa e motibo cu e ta un vacuna nobo y tambe un sistema di vacuna a wordo traha di un manera nobo, caminda bo mester ta prepara pe.

Koolman a laga sa cu lastimamente den tur vacuna semper nos por haya alergia. Pero nan mester tene cuenta cu e cantidad. Cuanto vacuna bo a duna y cuanto reaccion bo a haya y ki sorto di reaccion bo a haya. Tur informacion aki nan mester di dje, caminda nan mester centralisa pa por mand’e via Hulanda pa e fabricante pa nan tene cuenta riba kico ta e efectonan di cual di e vacunanan. Asina nan por evalua si mester para nan of drech’e of adapt’e a base di informacion valido.

El a aclaria cu esaki no kiermen cu e vacuna no ta bon. Sino cu e ta simplemente cu nos ta ser humano y bo por haya un alergia ora di haya un vacuna. Te hasta cu remedi mes bo por hay’e, ya cu simplemente e naturalesa of sistema di ser humano ta traha asina, y bo no por evit’e.