Departamento di Salud Publico di Aruba, DVG, no ta stop di enfatisa riba e importancia di tuma e vacuna contra COVID.
Segun DVG, na Aruba nos ta mira claramente con efectivo e vacuna ta, “si tuma nota cu entre poblacion di 12 aña bay ariba na Aruba, unda un promedio di 67.5% ta vacuna, toch ta e minoria cu no ta vacuna ta esnan cu ta bezig ta test mas tanto positivo y tambe ta bezig ta rekeri cuido medico adicional mas tanto.”
Departamento di Salud Publico ta traha y fiha su maneho basa riba data y analisis pa cual motibo e informacionnan aki ta veridico y ta guia DVG pa sigui promove e aplicacion di e vacuna como e miho forma di prevencion.
Pa loke ta categoria di edad di esnan vacuna na Aruba, DVG ta observa cu entre edad di 45 cu 80 aña nos comunidad ta vacuna riba 70%, loke ta positivo, pero toch e porcentahe desea ta riba 85%.
Loke tambe DVG ta observa ta e categoria di edadnan cu ainda ta vulnerabel, cu ta entre 12 cu 44 aña y tambe 80 bay ariba, cu ta bao 70% di vacunacion.
E vacuna di Pfizer cu Aruba ta suministrando ta dunando resultado.
Segun datonan di dia 9 di augustus cu un total di 803 caso positivo unicamente 6 di tur esnan interna (18%) ta persona vacuna interna den hospital pa cuido medico, di cual ningun (0) ta riba ICU y mayoria ta na cas recuperando rapido sin necesidad di cuido medico adicional.
Pa e motibo aki cu DVG ta sigui enfatisa riba e importancia di vacuna contra COVID y ta haci un yamado na comunidad, specialmente entre edad di 12 cu 45 aña ,y tur persona cu ainda no a vacuna, pa vacuna mas pronto posibel. Haci bo cita preferiblemente via www.dvg.aw of via Aruba Health App, of por yama 522-4200 of 280-0101 of 522-4211of 522-4210 of 522-4214. Pa tuma e prome dosis di e vacuna, ta necesario pa haci un cita.
