Aña pasa den luna di maart Minister di Salud y Turismo, Dangui Oduber, DVG, Ministerio di Salud Publico, Ministerio di Deporte y IBISA a introduci e campaña ‘Sa Bo Number’. Un campaña cu ta enfatisa na comunidad pa tuma e iniciativa y responsabilidad social di midi cintura regularmente na cas. E meta di e campaña aki ta pa yuda disminui e problema di obesidad y malesanan cronico entre e poblacion di Aruba.
Na Aruba e porcentahe di persona cu sobrepeso ta relativamente halto, alrededor di 80%, y 50% di e porcentahe aki ta cay den e categoria di obesidad. Obesidad y su riesgonan ta afecta e estado fisico, mental y emocional di un persona. Alrededor di 50% tambe ta sufri di sobrepeso.
Tin tres diferente categoria di peso: peso saludabel, sobrepeso y tambe obesidad.
Un persona cu un peso saludabel ta un persona cu tin un balans entre su estatura, edad y genero.
Un persona cu ta sobrepeso, tin un desbalansa entre e factornan aki y un persona cu ta obeso ta un caso mas severo di sobrepeso.
Obesidad tin hopi riesgo y den hopi caso e persona no ta nota esaki pa motibo cu e percepcion di kico ta sobrepeso of kico ta obesidad ta robes. Den caso di obesidad no por pone solamente un tipo di causa ya cu tin diferente factor cu por afecta esaki.
Manera ta conoci obesidad tin consecuencianan hopi malo pa salud di un persona. E por causa diabetes, colesterol halto, presion halto, locual por pone e persona na riesgo pa sufri di un stroke, un ataca di curason of por hasta bira pashent di dialyse.
Pa e motibo aki, Minister di Salud y Turismo, Dangui Oduber, DVG, Ministerio di Salud Publico, Ministerio di Deporte y IBISA a bin cu e campaña ‘Sa bo Number’. E campaña aki a ser lansa como e comienso di hopi mas campaña pa concientisa comunidad ariba e importancia di salud y trece cambionan saludabel, un habito nobo y miho calidad di bida tambe pa cada persona.
Recientemente DVG a publica ariba nan pagina di Facebook cu nan ta activo cu e campaña ‘Sa Bo Number’ pa brinda informacion, conscientisa y midi e numbernan di vital importancia pa salud di un persona.
“Den cuadro di plan prevencion di salud e campaña SaBoNumber aki ta keda activo den nos comunidad. E campaña ta pa cada persona pone mas atencion den nan salud y pa educa pa sa nan numbernan, yuda conscientisa den area di prevencion y asina duna aporte na cada persona pa crea mas responsabilidad pa sigui hasi nan control pa mehora nan salud,” DVG a publica.
